ROJNAMA WAR

2012/02/07

سه‌ره‌رای هه‌بوونا قانوونێ
كوشتن و نێچیرا گیانه‌وه‌ران به‌رده‌وامه‌

‌

هه‌لگر به‌هائه‌ددین

ب ده‌رچوونا قانوونا چاككرن و پاراستنا ژینگه‌هێ ژ په‌رله‌مانێ كوردستانێ ل سالا 2008ێ هیڤى و دلخۆشییه‌ك د دلێن وه‌لاتییان دا هاته‌ چاندن، چونكو ئه‌و ب هیڤى بوون كو پشتى ده‌رچوونا ڤێ قانوونێ، هه‌ر زێده‌گاڤ و سه‌رپێچكاره‌ك ل سه‌ر ژینگه‌هێ دێ روو ب روو قانوونێ بیت، ب تایبه‌ت ژى كه‌سانێن سینگێ خوه‌ دده‌نه‌ چیا و نهالان و ب دله‌كێ ره‌ق نێچیرا بالنده‌ و گیانه‌وه‌رێن كووڤى دكه‌ن، چونكو ئێك ژ به‌ندێن ڤێ قانوونێ گرێداى نێچیرا بالنده‌ و گیانه‌وه‌رێن كووڤى یه‌، لێ وه‌كو ئه‌م دبینین و ل ده‌زگه‌هێن مه‌دیایى دهێته‌ پێشچاڤ؛ هێشتا دیارده‌یا كوشتن و نێچیرا بالنده‌ و گیانه‌وه‌رێن كووڤى هه‌یه‌، ب تایبه‌ت ژى د ڤى وه‌رزێ زڤستانێ دا ڕاڤ و نێچیرا كه‌وان زێده‌بوویه‌، پترییا كه‌سانێن ب كارێ نێچیرا كه‌وان و بالنده‌ و گیانه‌وه‌رێن كووڤى رادبن؛ كورێن ده‌وله‌مه‌ندانن، كو بۆ خۆشییا خوه‌ ڤى كارى دكه‌ن، دیسان ژى گه‌له‌ك كه‌س هه‌نه‌ بۆ بازرگانیكرنێ نێچیرا ڤان گیانه‌وه‌ران دكه‌ن، ئه‌ڤه‌ ژى وێ چه‌ندێ دگه‌هینیت كو هێشتا ئه‌و قانوونا ل سه‌رى مه‌ ئاماژه‌ پێكرى؛ ب دروستى نه‌كه‌ڤتییه‌ كارى و به‌رهه‌ڤیێن باش بۆ نه‌هاتینه‌ كرن، چونكو ئه‌گه‌ر قانوونا هان ب دروستى جهێ خوه‌ گرتبا؛ ب دیتنا من كێم كه‌س دا هه‌بن خوه‌ لبه‌ر سینگێ قانوونێ بهه‌لاڤێژن و به‌رده‌وامیێ بده‌نه‌ نێچیرا بالنده‌ و گیانه‌وه‌رێن كووڤى.
وه‌كو دهێته‌ زانین چه‌ند ده‌زگه‌هـ و سازییه‌كێن وه‌كو فه‌رمانده‌یا پاراستنا ژینگه‌هێ، رێڤه‌به‌رییا ژینگه‌هێ و رێڤه‌به‌رییا پۆلیسێن دارستانێ بۆ پاراستنا ژینگه‌هـ و دارستانێ و نه‌هێلانا كوشتن و نێچیرا بالنده‌ و گیانه‌وه‌رێن كووڤى هاتینه‌ دامه‌زراندن، لێ وه‌سا دیاره‌ ئه‌ڤ سازییه‌ نه‌شیاینه‌ ب ئێكجارى رێگریێ ل كوشتن و نێچیرا بالنده‌ و گیانه‌وه‌ران بكه‌ن، ئه‌ڤجا ئه‌گه‌ر هه‌ر هۆسا رێ ههمبه‌رى كوۆشتن و نێچیرا بالنده‌ و گیانه‌وه‌ران ڤه‌كرى بن؛ ئێدى ئه‌ڤ بالنده‌ و گیانه‌وه‌رێن ل چیا و نهاڵ و دنڤ ژینگه‌ها مه‌ دا‌ دێ ژ ترسا جان ژده‌ستدانێ ڕه‌ڤن، له‌ورا پێدڤییه‌ ئه‌ڤ سازیێن گرێداى پاراستنا ژینگه‌هێ پتر رۆڵێ خوه‌ بگێرن و دوور ژ واسته‌كارى و مرۆڤكانێ سه‌رپێچكارێن ژینگه‌هێ روو ب روو قانوونێ بكه‌ن، داكو بۆ هه‌موو دوژمن و كۆژه‌كێن بالنده‌ و گیانه‌وه‌ران ببنه‌ ده‌رس، دیسان ژى فه‌ره‌ كار بۆ گه‌هاندنا ره‌وشه‌نبیرییا ژینگه‌هێ د ناڤ جڤاكى و هه‌ر ماله‌كێ دا بهێته‌كرن.

زانست

تنێ بۆ ژنێ

ئابور

ژینگه‌ه

قانوون

ساخله‌می

په‌روه‌رده‌