| |
|
|
| 2012-08-01
|
|
بۆ دەستەيا بلندا کوردي |
 زەھيا ئهحمەد شێخۆ
پشتي روودانێن لسەر گۆرەپانا سووريايێ ب گشتي و ب تايبەتي يا کوردي، د ڤێ قۆناغا شۆڕشگەري دە، لدووڤ مەرج و کاودانێن دەرڤە و يێن ناڤخوەيي، ھەروهسا لدووڤ ھەبوونا ھێز و گەنگازيێن نيشتيماني، دڤڕ دە، دبە کو گەلەک بوويەرێن دژبەر دەرکەڤن پێشبەري بزاڤا نيشتيمانييا گەلێ کورد. ھەروهسا ئەڤ ژي، ل دژي گەلێ کورد، ژ بۆ پاراستنا `سينۆر` و بەرژەوەنديێن خوە رێ لبەر دەولەتێن سەردەست ڤەدکە.
ل ھەمبەري روودانێن ب ڤي رەنگي، ژ بزاڤا کوردي، ژ ھەمي دەمان پتر ھۆشياري تێ خوەستن. دڤێت؛ گەلەکي ھۆشيار بە! دڤێت؛ بەري ھەر تشتي، يەکيتييا خوە (نە بەس) بپارێزە، ڤێ يەکيتيێ ب ھێزتر بخە و بەرەو پێشڤەتر ببە. دڤێت؛ لدووڤ پەيمانێن نێڤنەتەوهيي يێن دەرباري مافێن مرۆڤان دە، ژ بۆ بجھئانينا ماف و بەرژەوەنديێن گەلێ خوە ژير، بيربر و خوەدي بريار بە. دڤێت؛ ژ ھەمي دەمان بێھتر، ھەر کەس خوە بەرپرس ببينە و ب گيانێ بەرپرسيەک مەزن ب کارووبارێ خوە ڤە رابە.
ئەز ژي، وەکو ژنەک کورد، وەکو دايکەک کوردان کو ژ پاشەرۆژا زارۆکێن خوە بەرپرسە، ئەڤ خالێن ل خوارێ، وەکو پێشنيار پێشکێشي دەستەيا بلندا ل رۆژاڤايێ کوردستانا پيرۆز دکم:
ھەڤکاري
1- دڤێت؛ دەستەيا بلند جھێ لێڤەگەرا گشتي (ژ بۆ نەرين و پێشنيارێن کەساتيێن ئازاد، سياسەتمەدار، رەوشەنبير، رێكخستنێن سياسي، کۆمەلێن جڤاکي و ھتد.) بە.
2- دڤێت؛ پەيمانا ھەولێرێ (دگەل بجھئانينا بەندێن وێ) بھێتە پاراستن، ھەروهسا جھێ رەزامەندي و رێزگرتنا ھەمي ئاليان بە.
3- دڤێت؛ لسەر ئاستێ کوردستاني (ب تايبەتي ژ لايەنێن خوەدي ئيمکان)، پشتگرييا ماددي و مانەوييا بەردەوام بھێتە خوەستن.
راگەھاندن
دڤێت؛ دەستەيا بلند، گرينگييەک بەربچاڤ ڤي بەشي بنرخينە. چونکە، رێيا گەھشتنا سەرکەفتنێن مەزن د ڤي واري دە دەرباس دبە. ژ بەر ڤێ چەندێ:
1- دڤێت؛ ژ بۆ چاڤدێرييا چاپەمەنييا نڤيسکي و ديدەييا نێڤنەتەوهيي، سازييەک ب رێکوپێک بھێتە دامەزراندن.
2- دڤێت؛ ژ بۆ چاڤدێرييا ڤي بابەتي، کۆميتەيێن بەرفرەھـ کو ژ گەلەک کادرێن بسپۆر پێکھاتنە بھێنە ئەرکدارکرن.
3- دڤێت؛ نوچە، شرۆڤە و گۆتارێن کو دەرباري کورد و کوردستان دە (ئەرێني يان نەرێني)، د چاپەمەنييا ناڤخوەيي و نێڤنەتەوهيي دە دھێنە بەلاڤکرن، ژ لايێ ڤان کۆميتەيان ڤە بھێنە دەستنيشانکرن، ئاناليزکرن و ب شێوەيەکي پسپۆرانە بھێنە بەرسڤاندن
4- رێزداران، وەکو ھوون باش دزانن، ئەم د دەليڤەيەک پر تەنگ دە دەرباس دبن. د مێژوويا تەکۆشينا گەلێ مە دوور و درێژ دە، يەکەمين جارە کو دەرگەھێن ژيانێ يەک ب يەک لبەر مە ڤەدبن.
بارێ مە بارەکي گرانە.
ئارمانجا مە ئارمانجەک پيرۆزە.
ل پێش رۆناھييا ڤێ زانين و تێگەھشتنێ، دڤێت ژ رامان و بيرێن ھەرزان ئەم دوور بکەڤن. ژ مە تەڤان دھێتە خوەستن کو ژ ھەمي کۆمپلەکسان ئەم خوە بشۆن. د ھەلکەفتنەک وهسا زێرين دە نابە بەرژەوەندييا تايبەت بھێتە بەرچاڤکرن.
بژي يەکيتييا گەلێ کورد
|
|
|
|
|
|
|
