| |
|
|
| 2012-07-29
|
|
ل دووڤ راپرسييهكێ سيستهمێ پهروهردهيێ ل ههرێمێ شكهستن ئينايه |
 : بورهان
ل دووڤ راپرسييهكا ئهنستيتويا كوردستان بۆ مافێن مرۆڤي، رێژهيا پترييا پشكداران وهسا دبينن كو سيستهمێ پهروهردێ ل ههرێما كوردستانێ شكهستن ئينايه .
عهلي كهريم سهرۆكێ ڤێ ئهنستيتويێ ل دۆر ژمارهيا پشكداران و ئهنجامێن ب دهستكهڤتي د ڤێ راپرسينێ دا بۆ وار دبێژيت: ئهڤ راپرسينه ل ههر سێ پارێزگههێن ههرێمێ ب پشكدارييا 100 مامۆستا، بسپۆر، رێڤهبهر، سهپهرشت و ڤهكۆلهرێن جڤاكي و ديسان ب پشكدارييا 5000 فێرخوازان هاتييه ئهنجامدان. مهرهمێن سهرهكيێن ئهنجامدانا ڤێ راپرسينێ دياركرنا راستييا رهوشا پهروهردهيێ و دهرئێخستنا كێماسي و كێشهيێن وێ و ههلسهنگاندنا رێژهيا سهركهفتنا سيستهمێ نوو يێ پهروهردهيێ و شێوازێ جێبهجێكرنا وێ ل ههرێمێ بووينه، بۆ هندێ پێنگاڤێن باشتر و ب پلانێن نوو بهێنه هاڤێشتن داكو سهركهفتنا پهروهردهيێ مسۆگهر ببيت.
سهرۆكێ ئهنستيتويا كوردستان ل دۆر ناڤهرۆكا ئهنجامێن ڤێ راپرسينێ بۆ وار گۆت: ل دۆر ڤێ پرسيارێ كا ئايا تو سيستهمێ پهروهردێ ب شێوهيهكێ گشتي چهوا دبيني ئهڤ ئهنجامه ب دهست كهڤتييه: 44.4% وهسا دبينن كو سيستهمي شكهستن ئينايه ، 19.4% دبينن كو سيستهمێ پهروهردهيێ سهركهڤتن بدهستڤهئينايه، 25.4% دبينن كو تا راددهيهكێ سهركهڤتي بوويه و 10.8% ژي بهرسڤا (نزانم) داينه. ههر د بهشهكێ ديێ ڤێ راپرسينێ 52% ژ خويندكاران دبێژن سيستهمێ پهروهردهيێ شكهستن ئينايه و 33% دبينن سهركهڤتي بوويه. د لايهكێ ديێ ڤێ راپرسينێ ل دۆر ڤێ پرسيارێ كا كێشهيێن دكهڤنه بهر پهروهردهيێ چنه؟ ئهڤ ئهنجامه ب دهستكهڤتييه: 47% وهسا دبينن كهلوپهل و كهرستهيێن پێدڤي بۆ سهرئێخستنا سيستهمي نههاتينه دابينكرن و 20% وهسا دبينن كو مامۆستا فێري ڤي سيستهمي نهبووينه و نهشياينه ب دروستي ڤي سيستهمي جێبهجێ بكهن، و 9% وهسا دبينن لايهنێن ديێن جڤاكي ب باشي ژ ڤي سيستهمي تێناگههن، ديسا د پشكهكێ ديێ ڤێ راپرسينێ وهسا هاتييه كو، 47% وهسا دبينن پێشێلكاريێن مافێن مرۆڤان ل خواندنگههان ناهێتهكرن و د بهرامبهر دا 28% دبينن تا رادديهكێ پێشلكاري دهێتهكرن. ديسا 31% دبينن توندوتيژييا دهرووني و سڤكاتيكرن ل خواندگههان ژ لايێ ههر دو لايهنان ڤه ههيه و 46% دبينن كو كادر، كهرسته و جههكێ باش بۆ خواندگههان نينه، ديسا 37% رۆلێ دامودهزگههێن پهروهردێ خراب دبينن و 22% باش دبينن، ههروهسا 46% ژ فێرخوازان كێشهيا خوه دكۆمكرنا نومرهيان دا دبينن و 19% د پرۆگرامێن وانهيان دا.
ل دۆر لايهنهكێ ديێ ڤێ راپرسينێ بۆ كێشهيێن ههيي يێن سيستهمێ پهروهردهيێ عهلي كهريم دبێژيت: پشكداران ئهڤ تێبينيێن ههنێ نڤيساينه، نمره ب دروستي بۆ فێرخوازان ناهێتهدان و جوداهي دناڤبهرا فێرخاوزان دهێتهكرن، مامۆستايێن بسپۆر د ههموو بواران دا نهبوويه داكو سيستهمي ب دروستي جێبهجێ بكهن، ديسا دهستێوهردانێن حزبي كارتێكرنا خوه ههبوويه، ژمارهيا ئاڤاهيێن خاندنگههان كێمه و كهرسته ب رێژهيا پێدڤي نينن.
ل دووماهيێ عهلي ڤيا بێژيت كو فهره و داخواز دكهين لايهنێن پهروهردهيي ڤێ راپرسينێ گرنگ وهربگرن و بۆ خوه مفاي ژێ وهرگرن بۆ پێداچوون، چاكسازي و گهشهپێدانا ههموو لايهنيا سيستهمێ پهروهردهيێ .
|
|
|
|
|
|
|
