| |
|
|
| 2012-07-29
|
|
ترومبێلێن نوو مهكينه و ههيكهلهكێ لاواز .. حوكمهتێ چ چاڤدێرى لسهر هاتنا ترومبێلێن نوو نينه |
 ريپۆرتاژ: بورهان يهحيا
پشتى رهوشا ئابوورييا ههرێمێ باشتر لێهاتى، ئێدى ترومبێلێن نوو ب مشهيى ژ لايێ بارزگانان ڤه دهێنه ژۆر، لێ ههيكهل و ماكينهيا ڤان ترومبێلان لاوازن و چهندين كێشهيان بۆ خودانێن وان پهيدا دكهن. ئهڤ ترومبێلێن ههنێ ژ كيڤه و ب چ شێوه و رێكهفتنهكێ دهێنه ههرێمێ؟ جۆراتييا ڤان ترومبێلان ژ لايێ ههيكهل و ماكينهى ڤه د چ ئاست دايه؟ ئهرێ سهختهكارى د چێكرن و خزمهتگوزاريێن وان دا دهێتهكرن؟ سهرهدهرييا بازرگانان دگهل ڤان ترومبێلان چهوايه؟ د روودانان دا چهند زيان ب ترومبێلێن نوو دكهڤن؟ رۆلێ حوكمهتێ د چاڤدێرييا هاتنا ڤان ترومبێلان د چ ئاست دايه؟ بهرسڤا ڤان پرسياران د ڤێ ريپۆرتاژێ دا ب وهرگرتنا بۆچوونێن چهند كهسێن بازرگان، شارهزا د ترومبێلان دا، فيتهر و ريڤهبهريێن ميرى دا هاتينه بهرسڤدان.
(موحسن سهعيد) وهلاتييهكه كو ترومبێلهكا نوو كرييه و ل دۆر وان كێشهيێن بۆ وى چێبووينه ئهڤ گۆتنه بۆ وار ههبوو: من ترومبێلا خوه نوو ل پێشانگهههكێ كڕى پشتى چوار مههان ژ كڕينێ ماكينهيا وێ نهشيا سهرهدهريێ دگهل پانزينا مه بكهت و پستنێن وێ شكهستن و ل پيشهسازييا ترومبێلان گهلهك مهزاختى لێ چوون ههتا كو جارهكا دى شيام پاژۆم. جارهكێ ههڤالهكى پالێ خوه دا ڤێ ترومبێلێ و مه ديت لهشێ وێ چوو ژناڤدا چونكو ههيكهلێ ڤان ترومبێلێن نوو لاوازه، ههر چهنده سالۆخهت و خزمهتێن وان باشترن ژ يێن كهڤن، لێ ب نموونه ديار بوويه كو دهمێ روودانهك چێبيت ئهڤ ترهمبێلێن ههنێ بۆ نهفهرێن د ناڤ دا جهێ مهترسيێنه. داخوازێ ژ حوكمهتێ دكهين هندهك مهرجان ل گومركان بۆ ئينانا ڤان ترومبيلان ب دانيت داكو بازرگان ب كهيفا خوه نهبن و ههر جۆرهكێ وان ڤياى بينن داكو پتر مفا بگههيته وان.
(دهرفهت سپێرى) ژ پێشانگهها گاره يا كڕين و فرۆشتنا ترمبێلان، دياركر كو بازرگان فێلبازيێ د چێكرن و بازارێ ترومبێلان دا دكهن و بۆ وار گۆت: ترومبێلێن نوكه دهێنه ههرێمێ گرانييا وان كێمه و ههيكهل و ستوپێ وان ب هێز نينه و هندهك ترومبێلێن نوو پهرهشۆت پێڤه نينه و ئهگهر هات و روودانهك ب وێ ترومبێلێ چێبوو، زيانێن وێ دێ ب مهترسي بن. هندهك بازرگان دێ چنه وهلاتێن چينێ و كۆريا دێ وهسا دگهل كۆمپانيێن چێكرنا ترومبێلان پێكهێن كو جۆره ترومبێلهكێ چێكهن ئاسنێ وێ كێم بيت و مهرجێن خزمهتگوزاريێن وێ كێمتر بيت، ب تنێ بۆ هندێ كو ب پارهيهكێ كێمتر بهێنه دروستكرن داكو دهمێ ل ههرێمێ دهێنه فرۆشتن مفايهكێ پتر بگههيته وان، كێشه ب تنێ ههيكهل نينه بهلكو مهكينهيێن وانژى لاوازن، هندى سالهك دبووريت ترومبێلێن لاوازتر دهێنه ژۆر، بۆ نموونه پيكهما (deer) يێ نوو گرانييا وێ كێمه و خالا پاراستنا سلامهتييا شوفێرى تێدا گهلهك كێم بهرچاڤ هاتييه وهرگرتن.
فيتهر (نيوار حهسهن) ژ پيشهسازييا ترومبێلان ل مالتايێ كو ئهڤه 15 سالن فيتهرێ ترومبێلان ل دۆر جۆراتييا ڤان ترومبێلان ژ لايێ مهكينه و ههيكهلى ڤه بۆ وار دبێژيت: ترومبێلێن نوو مهكينهيا وان 14 و 16 نه و پستنێن وان بچووكن، لێ يێن كهڤن 20- 24- 26- و 30 بوون و پستنێن وان مهزنن، ديسان ترومبێلێن نوو دهنگێ جاددهى دكێشنه ناڤ خوه لێ يێن بهرێ ئهو دهنگ نهدهاته ناڤ ترومبێلێ دا، چونكو ههيكهلێ ترومبێلێن نوو لاوازترن ژ يێن كهڤن، و نوكه باراپتر ترومبێلێن نوو دهێنه پيشهسازييا ترومبێلان.
ژ لايهكێ دي ڤه مه خوه گههانده خودانێ كۆمپانييا DRR يێ فرۆشتنا ترومبێلان (موعتهز عوبهيدى) و ل دۆر شێوازێ گههشتنا ترومبيلان بۆ ههرێمێ بۆ وار گۆت: ترومبێل ژ كۆريا و چينێ دگههنه نوونهرێ سهرهكيێ مه ل عومان و ب رێكا وان ل سهر ههرێمێ و عيراقێ بهلاڤ دبن، كو ژ عومان دهێنه سووريێ و ژ وێرێ بۆ گومركا ئيبراهيم خهليل،ديسان رێكا دى ژ عومان دهێنه دوبهى و ژ وێرێ بۆ ئيران و ژ خالا سنوورييا حاجى عومران دهێنه ژۆر، رێكا سيێ ژ دوبهى دهێنه بهندهر عهباس ل ئيرانێ و ژ خالا گومركييا باشماخ ل سليمانيێ دهێنه ههرێمێ. ئينانا جۆرێ ترومبێلان ل دووڤ داخوازييا مهيه، لێ ئهگهر موشتهرييهكێ مه داخوازا جۆرهكێ تايبهت ب سالۆختێن باشتر و پتر بكهت ئهم دشێين بۆ بهرههڤ بكهين. پترييا ترومبێلان ژ لايێ كارخانهيهێ ب خوه ڤه دهێنه چێكرن لێ ئهگهر بازرگا داخوزا مهرجێن خزمهتگوزاريێن پتر بكهت كارخانه دێ بۆ چێكهت.
ديسان (دهرفهت) ژ پێشانگهها گاره نموونهيهكا فێلكرنێ د بازرگانيكرنێ ب ترومبێلێ ڤه ديار دكهت و دبێژيت: ل ئهلمانييا 1000 ترومبێل ژ لايێ كۆمپانيێ ب خوه ڤه هاتنه بڕين داكو ب ناڤێ وان نههێته فرۆشتن چونكو هندهك كێماسى تێدا ههبوون، لێ بازرگانهكێ ههرێمێ ئهو ترومبێلێن بڕى جارهكادى لێكدانهڤه و ژ خالێن گومركيێن ههرێمێ ئينان ژۆر و كهسێ ل گومركێ نهزانى كو ئهڤ ترومبێل بڕينه.
دهمێ مه پرسيارا رهسهناتييا ترومبێلان ژ (موعتهزى) بازرگانێ ترومبێلان كرى، ناڤبرى ئهڤ گۆتنه ههبوو: چ كێشه د رهسانهتييا ترومبێلێن مه دا نينه و ئهو كارخانه بۆ خهلكێ خوه و بازارێ خوهيێ ناڤخۆ ژى ههر ڤان جۆره ترومبێلان چێدكهت. گهلهك جاران بۆ ههيكهلێ ترومبێلێ فايبهرگلاس ژ ئاسنى باشتره، لێ ب شێوهيهكێ گشتى ئهگهر ترومبێل ب ئاسنى بهێته چێكرن مهزاختييا وێ پتره ژ ئاسنى، لێ پترييا ترومبێلێن نوو ب فايبهرگلاسى دهێنه چيكرن.
ههر ديسان مه بۆچوونا رێڤهبهرێ راگههاندنا هاتنوچوونا دهۆكێ (ئازاد تاها) ل دۆر بابتێ خوه وهرگرت و بۆ وار دبێژيت: ترومبێلێن نوو ب خوه كارهساتن چونكو ل دووڤ پيڤهرێن جيهانى ناهێنه چێكرن و سهنگا وان نهيێ ستاندهره و دهمێ روودان چێدبن ژبهر لاوازييا ههيكهلێ وان زيان دراڤى و گيانى گهلهك زێدهنه، ئهڤه ههموو بۆ هندێ دزڤريت كو مه ل گومركان چ پيڤهر نينه بۆ كێشان و ههلسهنگاندنا سالۆخهت و خزمهتگوزاريێن ڤان ترومبێلان و بێ چ مهرجهكێ دهێنه ژۆر. لهوا ئهز دگهل هاتنا ترومبێلێن نوو ب ڤان سالۆخهتان و جۆراتييان نينم، جاران چێبوويه ترومبێلهكا كهڤن و ترومبێلهكا نوو لێكداينه و مه ل رێڤهبهرييا هاتنوچوونێ ديتييه كو پتر زيان ب ترهمبيلا نوو كهڤتييه!
|
|
|
|
|
|
|
