| |
|
|
| 2012-07-29
|
|
ئهرێ راسته پهيوهنديێن جيرانييێ ل باژێڕي لاوازبووينه؟! |
 راپۆرت: كوردۆ رۆژهات
دهێته گۆتن كو پهيوهندي و تێكهليێن د ناڤبهرا جيرانان دا ل باژێرێ دهۆكێ و ب تايبهت ل تاخێن نوو ئاڤاكري بهرهڤ لاوازبوونێ چووينه و ل هندهك جهان ههما نهماينه ژي. دو گۆتنێن جودا ژي د ناڤ خهلكي دا ههنه كو ئالييهك دبێژيت ئهڤ لاوازييا پهيوهنديێن جيرانان كارتێكرنێن ئهرێني ههنه و ئالييهكێ دي ژي دبێژيت كو ب سستبوونا تێكهليێن جيرانان كهس د ههوارا ههڤدو ناچن و هيچ هاريكارييهكێ پێشكێشي ههڤدو ناكهن، ديسان چهند بۆچوونێن دي ژي ههنه. ئهڤجا بۆ هندێ كو راستييا ڤان گۆتگۆتكان زێدهباري چهندێن دي بۆ ههوه دياربكهين؛ مه ئهڤ راپۆرته بهرههڤكر.
گهنجهك ب ناڤێ ژێهات ميرخان لدۆر تێكهليێن جيرانێ د نوكه دا ب ڤي ئاواي بۆ مه ئاخڤت: راسته جيراني يا خۆشه و ب جيرانيێ پهيوهندي و تێكهليێن خهلكي بهێزتر لێ دهێن كو جاران دگههيته وي راددهي دو مالێن جيرانێن ئێك بێي ههڤدو خوه دهرناكهڤن ههتا پرسيارا ههڤدو نهكهن و گهلهك جاران ژي پێكڤه دهردكهڤن و دبيت رۆژانه ژي خوارن و تشتان بۆ ههڤدو دبهن، لێ وهكو ديار نوكه د باژێرێ دهۆكێ دا پهيوهندي و تێكهليێن جيران سست بووينه و دبيت ل هندهك تاخێن دهۆكي ب تايبهت يێن نوو ئاڤاكري ئهڤ پهيوهندييه ههما نينن و جيرانان هاي ژ ههڤدو نينه و ههر هندهك جيرانێن خوه ناسناكهن، ب ديتنا من ژي ئهڤه بۆ هندێ دزڤريت كو خهلكێ باژێرێ پتر ب كار و دهوامێن خوه ڤه مژوولن و زوو ب زوو تێكهلييا جيرانان ناكهن داكو زارۆيێن وان ژي فێري دهركهڤتنا كۆلانان نهبن، لهو دبيت ئهڤ چهنده يا باش بيت كو زارۆيێن وان پتر د مال ڤه بن و بخوينن و فێرێ كار و كريارێن خراب نهبن، ديسان ژي دياره كو مالێن د كۆلانهكێ دا ههر ئێك ب رهنگهكي يه و ژ عهشيرهتهكێ يه، لهو ژي پهيوهنديێن وان لاوازبووينه.
ژنهكا 38 سالي ب ناڤێ عايشا كو مالا وێ ل تاخهكێ كهڤنێ دهۆكێ يه، سهبارهت ڤي بابهتي ئهڤ بۆچوونه ههبوو: ب راستي مخابنه كو پهيوهندي و تێكهليێن جيرانان ل دهۆكێ لاوازبووينه و هێدي هێدي بهرهڤ نهمانێ دچن، چونكو نوكه دێ بيني مالێن د كۆلانهكێ دا كێم ب سهر ئێك ڤه دچن و ههر ههما هندهك سلاڤي ههڤدو ژي ناكهن و ئهڤه نێزيكي سالهكێيه مالهك بوويه جيرانا مه؛ هێشتا ب سهر مه ڤه نههاتينه و سلاڤي مه ژي ناكهن، كو ئهو ب خوه ل دهستپێكێ مه بخێرهاتنا وان ژي كرييه و چهندين جاران سلاڤي وان ژي كرييه، لێ ئهو ههر وهكو خوه نه، ئهڤجا ب ديتنا من ئهڤه تشتهكێ خرابه كو پهيوهندي و تێكهلي د ناڤبهرا جيرانان دا نهمينن، چونكو گهلهك جاران جيران د ههوارا ههڤدو دا دچن و د گهلهك كاران دا هاريكارييا ههڤدو دكهن، لێ ب ڤي رهنگي ئهڤه ژي بهرهڤ نهمانێ دچيت.
وهلاتييهك ژي ب ناڤێ رێناس دبێژيت: ب ديتنا من گهلهك باشه پهيوهندي و تێكهلي د ناڤبهرا جيرانان دا نهبن، ژبهركو دهما تێكهلي د ناڤبهرا جيرانان دا ههبن؛ دێ بيني د ژن و كچێن كۆلانهكێ ههموو ل بهر دهرگههێ مالهكێ روونشتينه خوار و جڤات گرێدايه و زهلام ژي ژ جههكێ كۆمبووينه، ب ڤێ چهندێ زارۆيێن وان ژي فێري دهركڤتنا كۆلانان دبن و تووشي كارێن خراب دبن، لهو سستبوونا تێكهليێن جيرانيێ بۆ ڤێ چهندێ باشه و دبيت ل گهلهك تاخێن نوو يێن دهۆكێ ئهڤ پهيوهندييه نهمابن و د چهند كۆلانان ڕا بهێي و بچي؛ تو چ ژن و كچان ل بهر دهرگههێ نابيني و زارۆيێن وان د مال ڤهنه و ژ كار و كريارێن خراب دووردكهڤن.
ل دووماهيێ ژي سهبارهت تێكهليێن جيرانيێ د جڤاكێ مه دا ڤهكۆلهرێ جڤاكي رهمهزان ئيسماعيل وهها بۆ مه پهيڤي: مخابن نوكه د جڤاكێ مه دا و ب تايبهت ل باژێري جيراني لاواز بوويه، نهخاسمه ل تاخێن نووئاڤاكري، كو ههر زوو ب زوو ههڤدو نانياسن و چ تێكهلي دگهل ئێك نينن، دبيت ئهڤه ژي ژ سهدهما هندێ بيت كو د كۆلانهكێ دا ههر مالهك ژ جههكي هاتبيت يان ژي خهلكێ باژێران ههردهم ب كارن و ژمال دهردكهڤن و دهما دهێنه مال ژي دهرناكهڤنه ژدهرڤهي مالێ.
ئايا لاوازبوونا تێكهلييان د ناڤبهرا جيرانان دا چ كاريگهري ههنه؟ ئهڤ پرسه ژي ئيسماعيلي وهها بهرسڤاند: دهمێ دايباب دهرنهكهڤنه كۆلانێ و تێكهلييا جيرانان نهكهن؛ بێ گومان ئهو ناهێلن زارۆيێن وان ژي ژ مال دهركهڤن و تێكهلييا زارۆيێن جيرانان بكهن كو فێري كار و كريارێن خراب ببن، لێ د ههمان دهم دا خێزانهك دشێت رێيێ ب زارۆيێ خوه بكهت كو ب تنێ ههڤالينييا زارۆيێ وي جێرانێ وان بكهت كو وان باوهري پێ ههيه و تێكهلي دگهل ئێك ههبن.
ژ ئالييهكي دي ڤه سهبارهتي تێكهلييا جيرانان ل ژدهرڤهي باژێران؛ ڤهكۆلهرێ هان گۆت: لێ ل كۆمهلگههـ و گوندان هێژ تێكهليێن جيرانيێ گهلهك بهێزن و وهكو خوه مايه، ئهڤه ژي بۆ هندێ دڤريت كو ئانجيێن گوند و كۆمهلگههان ههموو مرۆڤێن ئێكن و نێزيكي ئێكن،
|
|
|
|
|
|
|
