| |
|
|
| 2012-07-26
|
|
ئهنوهر شهعبان ئاكرهيى: دوازده سالا ئهز مژوولى كۆمكرنا ههلبهستێن ههلبهستڤانێ وهغهركرى (سهلمان شۆشى) بوويمه |
 ديدار: سالح محهمهد تهيرۆ - ئاكرێ
ههلبهستڤان (ئهنوهر شهعبان ئاكرهيي) ل سالا (1948) ژدايكبوويه و خاندنا خوه يا سهرهتايي و ئامادهيي ل ئاكرێ تهمامكرييه و خودانێ ديوانهكا ههلبهستايه و ب كارێ كۆمكرنا ههلبهستێن ههلبهستڤانێ وهغهركري (سهلمان شوشي) رابوويه و نها ژي هاتيه خانهشينكرن. د ديدارهكێ دا بۆ رۆژنامهيا وار، بهحسێ سهربۆرا خوه يا ههلبهستێ كر:
وار: ههلبهستڤان ئهنوهر شهعبان چ پێناسهيهك بۆ ههلبهستێ ههيه؟
ئهنوهر: ههلبهست ههستهكه كو دهربرينێ ژ ناخ و هزر و بيرێن مرۆڤي د ههمي قووناغێن ژيانێ دا دكهت.
وار: كهنگي ته ههلبهست نياسي يه و ئێكهم ههلبهستا ته كيژ بوو و ته چهند پرتووك چاپ كرينه؟
ئهنوهر: ل سالا (1978) من ئێكهم ههلبهست ل ژێر ناڤێ (كهمهر زێر) نڤيسي يه و ديوانهكا ههلبهستێن من ل ژێر ناڤێ (شاسوارێ چوار چرا) هاتيه چاپكرن، ژبلي كۆمكرنا ههلبهستێن (سهلمان شوشي) و نها رۆمانهك د ناڤ دهستێن من دايه.
وار: ل نك ئاكرهيي، چ جۆره ههلبهست يا خوشه؟
ئهنوهر: بێگومان ههر ههلبهستهكێ تام و خوشييا خوه ههيه، لێ ل نك من، ههلبهستێن كلاسيك ژ ههمي ههلبهستان خوهشتر و ب تامترن.
وار: ئهو چ ئهگهر و سهدهم بوون كو ئهنوهر هانداي ههلبهستێ بنڤيست؟
ئهنوهر: ههلبهت پشتي هلنگفتنا شۆڕشا ئهيلولا مهزن ل سالا (1975)ێ و ئاواره و دهربهدهربوونا مه بۆ ئيرانێ و پاش زڤڕينا مه بۆ كوردستانێ و دوورئێخستنا مه ل وارێ مه بهرهڤ باشورێ عيراقێ و زۆلم و ستهما كو ل مللهتێ من هاتيه كرن و ڤيانا وهلاتي و سروشتێ جوانێ كوردستانێ ئهڤه ههموو بوونه ئهگهر و سهدهم كو ئهز ههلبهستێ بنڤيسم.
وار: وهكي ئهم د ئاگههدار، بهرييا نها پرۆژهيهكێ كۆمكرنا ههلبهستێن ههلبهستڤانێ وهغهركري (سهلمان شوشي ) ل بهر دهستێ ته بوو دا كو بهێنه چاپكرن و ئهڤ پرۆژهيه گههشته كووڤه؟
ئهنوهر: راسته ئهڤه (12) ساله ئهز مژوولي كۆمكرنا ههلبهستێن ههلبهستڤان (سهلمان شوشي) مه و سوپاس بۆ تهڤايا ههڤالێن سهلماني كو وان ژي بۆ كۆمكرنا ههلبهستێن وي هاريكارييا من كر و من كۆمكرنا ههلبهستێن سهلمان شوشي ب ئهرك زاني تا كو نههێنه ونداكرن و بۆ جهژنا رهمهزانێ دێ ديوانا وي كهڤيته بهر دهستێ خوێندهڤانان.
وار: تو ب ههلبهستێن كێ يێ داخباري؟
ئهنوهر: بێگومان من ديوانێن گهلهك ههلبهستڤانان خواندينه و ب تايبهت يێن كهڤن مينا (مهلايێ جزيري، خاني، بهكر بهگێ ئهرزي، مهلايي باتهيي، فهقيێ تهيران، ئهحمهدێ نالبهند، پيرهمێرد، گۆران، نالي) لێ ئهوێن ئهز پێ داخبار؛ جزيري و خاني وفهقيێ تهيرانن.
وار: تو ههلبهستا ئهڤرۆ چهوا دبيني، ئهرێ ههلبهستێ تام و چێژا بهرێ مايه و ئهگهر نهمابيت سهدهم چنه؟
ئهنوهر: ب هزرا من، ئهڤرۆ ههلبهست يا هاتيه شێواندن و ههر كهسێ رابوو، دهست ب ههلبهست نڤيسينێ كرييه بێ كو رامانا ههلبهستێ بزانيت چيه، سهرهراي ڤێ چهندێ ژي، ژ لايهكێ ڤه، ههلبهست ژ لايێ هندهك ههلبهستڤانێن خودان شيان و بهرههمدار بهرهڤ ئاستهكێ پێشكهفتي دبۆريت.
وار:ل دهمێ تو ههلبهستهكا لاواز دخويني، ل جهم ته چ ههست دروست دبيت وهكو ههلبهستڤانهك؟
ئهنوهر: ههر ههلبهستهكا لاواز ل دهمێ ئهز دبينم و دخوينم، ههروهكي ئهز گوشتێ گيانێ خوه دخۆم، ژبهركو ههلبهستێ ل نك من پيرۆزييا خوه ههيه، لهوما داخوازێ ژ وان گهنج و لاوان دكهم ئهوێن نها ههلبهستێ دنڤيسن، پتر خوه ماندي بكهن و ديوانێن ههلبهستڤانێن مهزن بخوينن تا كو بگههنه ئاستهكێ پێشكهفتي و مفايي ژێ وهربگرن.
وار: دياره ل ڤێ دووماهيێ، ته رۆمانهك ل بهر دهسته و تو دنڤيسي، ئهو چ ئهگهر بوون تو هانداي كو بهرهڤ رۆمانێ ڤه بچي؟
ئهنوهر: من ب ئهركێ سهر ملێن خوه زاني كو ئهز ئهڤێ رۆمانێ بنڤيسم كۆ ئهو ژي يا گرێدايه ب كولتۆرێ ئاكرێ و دهوروبهر كو ئهو ژي سامانهكێ ڤي مللهتي يه، ئهگهر من ئهڤ كولتۆره ساخ نهكربا ڤه، ئهز باوهرم دا بهرزه بيت و مري بيت و ئهڤ رۆمانه ژي سهرهاتي و روودانێن بهرييا دو سهد ههتا چار سهد سالان دزڤڕنهڤه كو ل دهڤهرا ئاكرێ و دهوروبهر هاتينه روودان.
|
|
|
|
|
|
|
