| |
|
|
| 2012-07-22
|
|
دهۆك: ڤهكرنا ئێكهم پێشانگهها كارێن دهستى |
 ئاري محمد
ببهرههڤبوونا د.عصمت محمد خالد وهزيرێ پهروهردێ، پشكا كارێن دهستي ل رێڤهبهرييا چالاكييێن قوتابخانهيان ل دهۆكێ پيشانگهها خوه يا ئێكێ ل هۆلا چالاكييان ڤهكر.
ڤێ پيشانگههێ كو دۆرێن 30 كارێن دهستي ب خوهڤهگرتبوون، ژلايێ مامۆستا حهسهن حاجي و ببهرههڤببوونا رێڤهبهرێ گشتييێ پهروهردێ و هژمارهكا لايهنێن پهيوهنديدار هاتهڤهكرن.
وهزيرێ پهروهردێ پشتي گهريانهكێ دناڤ پيشانگههێدا، دلخۆشييا خوه همبهر پيشانگههێ دياركر و ئاماژه ب وێ چهندێ دا كو وهزارهتا پهروهردێ پشتهڤانه بۆ ههر بزاڤ و هزرهكا نوو دبياڤێ پهروهردێ دا بهێته هاڤێژتن و ئهڤ پيشانگههه ب كارهكێ ژ ههژي و نموونه هژمارت.
ڤهمان ئيسماعيل حهسهن بهرپرسێ پشكا كارێن دهستي ل رێڤهبهرييا چالاكييێن قوتابخانهيان دياركر كو ئهڤه ئێكهم پێنگاڤ بوو پشكا كارێن دهستي هاڤێژتي و بديتنا لايهنێن بهرههڤبوويي ژي پێنگاڤهكا سهركهفتي بوو. گۆتژي: پشتي ڤهديتنێن پشكا كارێن دهستي رازيبوون ل سهر دهێته كرن، لبهره كارێن باشتر بهێنه كرن و خول ژي بۆ مامۆستايێن هونهري بهێنه ڤهكرن كو خورتبوونهك بكهڤيته دبياڤێ كارێن دهستي دا و ئاشنابوونهك دناڤا قوتابخانهيێ و ل دهرڤه ژي بۆ هونهرێ كارێن دهستي ههبيت. ناڤبري ئهو چهنده ژي دياركر كو هونهرێ كارێن دهستي ژ وان كهرستهيێن بهردهست ههين دهێنه دروستكرن و ئاماژه ژي كر بۆ بهرههڤكرنا ڤێ پيشانگههێ ژي، دهمهك درێژه بهرههڤي بۆ دهاتنهكرن، ئهو ژي بۆ وێ چهندێ زڤڕاند كو هونهرێ كارێن دهستي دهم پێ دڤێت ههتا كهڤالهك، يان كارهك بهێته دروستكرن.
ئێك ژ پشكدارێن پيشانگههێ هونهرمهند ئاماد عبدالمناف زكري ئهڤ كاره ب كارهك نوو هژمارت و دياركر كو بهري نوكه ب ڤي ئاوايي ئهڤ كاره ل دهۆكێ، بهلكو ل سهرانسهري ههرێما كوردستانێ ژي نههاتييه كرن، گۆتژي: پتريا كارێن هاتينه بهرچاڤكرن، ل سهر شووشهيان هاتينه دروستكرن و ئهو كهرستێن بكارئيناين پێدڤي ب دهمهك درێژ ههبوو ههتا ل گهل ههڤ هاتبانه چهسپاندن. ههر وسا ئاماژهكر كو كارێن دهستي ئێك ژ هونهرێن گرنگه كو كهرهسته و كهلوپهلێن پێدڤي ژ سروشتي دهێنه كۆمكرن و لێكدانن ئهڤ ب خوه ژي ديتنهكا گياني و مرۆڤانتي پێ دڤێت ههتا كار دروست ببيت كو گرێدانهك ل گهل گهشهيا هزري و مهژي ههيه، لهوا ژي دبينين پتر زارۆيان بۆ چێكرنا كارێن دهستي هانددهن.
تێله، پلێت، قهسهل، داڤێن گيايێ هشك، بهر، دار و بهلگێن گولان وهك كهرستهيێن سروشتي بۆ چێكرنا كارێن پيشانگههێ هاتبوونه بكارئينان، ئهڤه ل دووڤ گۆتنا شێوهكار ئامادي بوو و زێدهتر گۆت: كارێ مه خشتهككرنا تشتانه كو ئهلهمنتێن جواني و دهربڕينێ تێدا دياربكهن. ناڤبري گۆتژي: ئهڤ كارێن دپيشانگههێدا هاتينه بهرچاڤكرن، دشياندايه ل ناڤ مالان بۆ جوانيێ بهێنه دانان و مفا ژێ بهێته ديتن. ناڤبري ئاماژه ب وێ چهندێ ژي كر كو ژبهر گرنگييا هونهرێ كارێن دهستي پێدڤييه لايهنێن پهيوهنديدار بۆ سهر ئێخستنا ڤي هونهري پتر دهاريكار بن و خولێن بهرفرههـ ژي يێن فێربوونێ بۆ مامۆستا و قوتابييان بهێنه ڤهكرن.
ژئاليێ خوهڤه ژي شێوهكار ياسمين صبري گۆت: هونهرێ كارێن دهستي ناڤگينهكا پهروهردهيي يا بهێزه ژبۆ ڤهديتن و شرۆڤهيا تشتان كو سهمتهكێ بۆ بهايێن تشتان ژ ئاليێ وژدانێ ڤه پهيدا دكهت، كو سهرهدهريكرن ل گهل ڤي هونهري كارلێكه ل گهل كهرستهيێن جودا و تێگههشتنهكه بۆ سروشت وكێشه و ژێدهرێن وان.
شێوهكار حسن عبدالغفور دياركر كو ئهڤ هونهره بدرێژييا ديرۆكێ ههبوويه و قۆناغ بۆ قۆناغێ وهراركرييه، كو دشههرهواريێن فارسي و بابلي و هندي و چيني دا شوونوارێن وان ههنه كو گهلهك كار ل سهر داري و تهقنێ و فخاري كرينه. دياره ژي تهلارێن سهروهر و حاكمان ب كارێن دهستي هاتنه خهملاندن، كو پارچهيێن بچووك يێن كهرستهيان ب شێوهيهكێ هونهري يێ جوان پێكڤه دنووساندن. گوتژي: دڤێ پيشانگههێدا ب شێوهيهكێ نوو كهڤال و كار هاتينه ژێگرتن و دانان. حهسهني هيڤي ژي خواستن كو ئهڤ پيشانگههه ببته دهرازينكهك بۆ پێشكهفتنا ڤي كاري و پتر گرنگي پێ بهێته دان و رێ بهێته خۆشكرن كو بشيێن ل باژێرێن دي يێن كوردستانێ و ئيراقێ ژي ڤي كاري بهرچاڤي خهلكهكي بكهين.
پێدڤي گۆتنێيه كو ئهڤ پيشانگههه ل رۆژا پێنجشهمبي 19/7/2012 ل هۆلا چالاكيێن قوتابخانهيان بپشكدارييا هونهرمهندێن شێوهكار: ( ئاماد عبدالمناف زكري، ڤيان حسين، مهاباد حسين، هبه يونس، حسن عبدالغفور، ئاواز محمد و ياسمين صبري) هاتبوو ڤهكرن. |
|
|
|
|
|
|
