| |
|
|
| 2012-07-04
|
|
ئهرێ ژن نهچاره خزمهتا زهلامي بكهت؟ |
 هودا كهريم
ئهڤ مژاره هندهكي ئالۆزه، ل دووڤ جڤاكا كو ژن تێدا ژيان دكهت، دمينيت. ل گۆر ڤهكۆلينا پسپۆرا جڤاكي يا بهرازيلي گريزيلدا دبێژيت كو ژنا رۆژههلاتي دهێته ناسكرن ب خزمهتا زهلامي ب وي مهرجێ كو رێزێ لێ بگريت و د هندهك جڤاكێن دي دا ژنان چ ئهركێن دي نينن، ژبلي پێكئينانا فهرمان و خواستێن زلامێ كو دگهل ژيان دكهت. ئهڤ مژاره گرێدايه ب نهريتێن ههر جڤاكهكێ، ل هندهك جڤاكان نهريتێن جڤاكي ههمي د بهرژهوهندا زلامي دانه، لێ د هندهك جڤاكێن دي دا نهريتێن وێ جڤاكي دگههنه وي رادهي ستهمكاري ل ژنێ بهێته كرن، بۆ نموونه نابيت ژن داخوازا بهردانێ بكهت، زلامێ وێ چهند دگهل دا خراب ژي بيت.
جڤاك گهلهك جاران نهرتێن وهسا فهرز دكهت و رۆلێ زلام و ژنان پارڤه دكهت و يا بهربهلاڤه كو زلام نهشێت ب كارێن مالێ رابيت، وهكي خوارن لێنانێ و خودانكرنا زارۆكان و لێكدانا مالێ، لهوما ژن نهچاره ڤان كاران ههموويان بكهت، چهند ژنهكا كاركهر، يان فهرمانبهر ژي بيت.
ئهڤه دناڤ مه دا بۆچوونهكێ ب هێزه، د هندهك جڤاكان دا زلام رانابيت بۆ كو ئاڤهكێ ژي ڤهخوت، ئهڤه ژي ئهركێ ژنێ يه بۆ بينيت، گهلۆ ئهڤێ نهشێت بكهت، يان نهزانينا زلام ب كارێن مالێ هێنجهتهكه خوه پێ رزگار دكهت. گريزيلدا دڤي دهرباري دا دبێژيت: ئهگهر ئهم بهحسا خوارن لێنانێ بكهن، ئهم دێ بينين كو 90% ژ شيفێن خورانێ ل خوارنگههان ل سهرانسهري جيهانێ زلامن و گهلهك ژ ژنان باشتر دزانن خوارنێ چێكهن. لێ زلامێ مالێ پێكۆليێ ژي ناكهت فێري چ خزمهتێن ناڤ مالێ بكهت ول دووڤ نهريتان كارێ مالێ ژ ئهركێ ژنێ دبينيت، نهچاره بكهت و فهرمانێن وي بجه بينيت. د هندهك مالان دا، زلام بێكاره ژي و ژن كارێ ژ دهرڤهي مالێ دكهت و ههر نهچاره دهما دزڤريته مالێ، كارێ ناڤ مالێ ژي بكهت و ئهو زلامێ بێكار و بهتال، چهوا ژي بيت ههر كارێ ناڤ مالێ ئهركێ ژنێ يه.
خزمهتا راستهقين ئانكۆيا رێزگرتنێ يه بۆ ههڤدو، و نابيت بهێته فهرزكرن، ئانكو چاڤدێريا ژنێ بۆ زلامي، يان چاڤدرێريا زلامي بۆ ژنێ مژارهكا ئالۆگۆريێ يه، لێ زلام ئهڤ تێوريه ل سهر ژنێ فهرز كريه، ئانكو بۆ ژنێ كريه فهرز كو خزمهتا زلامي بكهت ژبهر كو خوه ژ وێ بهێزتر دبينيت، ئانكو ل دووڤ ياسايا حكومي بهێزي ل سهر لاوازي.
خزمهتا ژ بێ چارهيي واته فهرزكرنا مژارهكێ يه ل سهر مرۆڤي و ههر تشتهكي دهێته فهرزكرن تهعدارييه ل سهر مافێن كهسۆكي ئانكو ئهڤهژي دهستدرێژيهكه ل سهر مافێن ژنێ، ژبهر كو گهلهك زلام ههنه مافهكي بچووك ژي نادهنه ههڤژينێن خوه، ئانكو ژ رێزێ ل ههبوونا وێ ناگرن، لێ دگهل هندێ را ژي خزمهتكرنا وي ل سهر وێ ژنێ فهرزه.
دهما ژن دبينيت كو ئهو نهچاره خزمهتا زلامي بكهت، ئهڤه راستهخۆ كارتێكرنێ ل كهسايهتيا وێ دكهت، ههست ب وێ چهندێ دكهت كو ئهو ئاميرهكه پهيدا بوويه بۆ تهناهييا زلامي. دڤي دهربارهي دا تايبهتمهندا ناڤبري دبێژيت، ئهگهر ئيلاه دڤێت ژن خزمهتا زلامي بكهت، ل بهرامبهر دا دڤێت زلام رێزێ لێ بگريت، لێ دگهلهك رهوشان دا ژن زێدهباري خزمهتكرنا زلامي، دڤێت بێ دهنگ ژي بيت ل بهرامبهر ئيهانا زلامي ئهگهر خزمهتا وێ ل دووڤ حهز و هزرێن وي نهبيت، هندهك زلام وهسا دبينن كو ژن نهچاره خزمهتا وي بكهت، ئهگهر خيانهت ژي لێ كر و كهرامهتا وێ بن پێ كر، ل گۆر من ئهڤ زلامه تاوانبارن.
|
|
|
|
|
|
|
