| |
|
|
| 2012-07-03
|
|
مالكي و ڤهكێشانا باوهريێ و دهستوور! |
 مافپهروهر
ئهحمهد عارف ئامێدي
رۆژ بۆ رۆژێ نيشانێن ڤالا ل حوكمهتا مالكي زێده دبن، ئهوا ب وێ پرۆسێسا سياسي برێڤه دبهت كو لژێر سيبهرا وێ ههموو ئاستهنگ بهرهنگار دبنێ، زێدهباري وان بهربهستێن دكهڤنه د رێكا كارێ حوكمهتێدا، ئهڤجا د ئاسايي بن، يانژي دهستكار كو ههموو دبنه ئهگهر و ئهنجامێ ڤێ حوكمهتێ بۆ ههموو ئيراقا ههڤگرتي و لسهر ههموو ئاستان.
ههموو دبێژن ئهگهرێ سهرهكي يێ گيرۆبوونا كارێن ڤێ حوكمهتێ ڤهدگهڕن بۆ تاكلايهنييا نورى مالكي كو كاري ب سياسهتا زهلامێ ئێكێ د ههموو گهێن حوكمهتێدا دكهت، چنكو پترييا وهزارهتان تاكو نهۆ ب وهكالهت ئهو برێڤه دبهت، ئهو چهنده ژي دبيته ئهگهرێ سهرهكيێ لاوازبوون و پاشڤهزڤڕينا كارێ ڤان وهزارهتان، ئهوچهند ژى ڤهدگهڕيت بۆ وێ ململانه و ژ ههڤدووربوونا سياسي و ئالۆزييا د ناڤبهرا پێكهاتهيێن سياسيدا و سهرهدهريكرنا وان دگهل ههڤ ب پهيڤا (ئهز ب تنێ) ئهوا بهرژهوهنديێن پێكهاتهيان بسهر بهرژهوهنديێن بلندێن نيشتيماني دئێخيت د ئيراقا ههڤگتيدا، چنكو ب لێبۆرينڤه دێ بێژم، بهرێخۆدانا مالكي و حوكمهتێ ب (ئهزئهزيێ) يا لڤۆك و لاوازه.
ئهڤرۆ بيرۆكهيا ستاندنا باوهريێ ژ حوكمهتا نهۆ مافهكێ دهستوورييه، چنكو ماددهيا (58)ێ ژ دهستوورێ ئيراقێ ڤێ چهندێ ديار دكهت، ژبهر ئهڤچهندا د پرۆسێسا سياسيدا ههيي كو كۆمهكا زێدهگاڤي و ڕهههندان دگهل دامهزراندنا وهلاتي پشتي سالا 2003ێ دگهل پهيدابووينه، پێخهمهت بهرژهوهنديێن پيكهاته و حزبان و پشتگۆهخستنا ههڤپشكا خوه يا سهرهكي ژ لايێ مالكي ڤه كو ههڤپهيمانييا كوردستانييه و ڤهگهڕاندنا ئيراقێ بۆ چوارگۆشهيێ ئێكێ و برنا وێ بهرهڤ گڤاندهيێ، ئهگهر ژي ئهوه كو حوكمهتا مالكي رێككهڤتنێن دگهل حوكمهتا ههرێمێ بجهـ ناكهت، بهلكو كێشه و گرفتان ل ڤێرێ و وێراههنێ زێدهتر چێدكهت، نهخاسمه بجهنهكرنا ماددهيا (140) و بادهكا پێشمهرگهيى وهكو هێزا پاراستنا ههرێمێ و ههڤبهستێن نهفت و گازێ و چێكرنا بهربهستان بۆ كارێ وان كۆمپانييان ل ناڤخوهييا ههرێمێ و هاريكارييا لايهنهكى و پشتگۆهخستنا ئێكێ دي پێخهمهت پاراستنا بهرژهوهنديێن مالكي و حزبا وي.
شوونا ئهڤ هاتنووچوونه ببنه خزمهت بۆ پرۆسێسا سياسي ب گشتي، د چوارچوڤهيێ تايبهتمهندي و هزروبيراندا، ئهو بهروڤاژي بوون و بوونه ململانهيێن پێكهاته و حزب و كهسان كو ب وان پلهيا شهڕێ راگههاندنێ و ئاراستهكرنا گۆنههبارييان د ناڤبهرا حوكمهتا ناڤهنديدا نهشيايه بچووكترين خزمهتگۆزاري پێشكێش بكهت.
ئهڤرۆ حوكمهتا ناڤهندي ب سهركێشييا نوري مالكي د بهرفرههترين بياڤێ گهندهلييا كارگێري و ئابووريدا دبۆريت، ههروهسا ئالۆزييا سياسي دگهل ههموو ليسته و پێكهاتهيان ههيه بۆ مانا مالكي د حوكمهتێدا و زڤڕاندنا مه بۆ زهلامێ ئێكانه و دكتاتۆرييا رهش، ياكو چو ئيراقيێن خۆدان رهوشت ڤێ چهندێ نهخوازن، ئهوا ئهڤرۆ حوكمهتا ههرێمێ و ههموو لستهيێن دي دڤێت باوهريێ ژ مالكي و حوكمهتا وي وهربگرن كو ئهگهر ژي د زۆرن، ژ وان ئهڤ رهههندێن نهۆ پهيدابووين و رهتكرنا يێ دي، ب تايبهتى ژي بهلاڤبوونا گهندهليێ ب رێژهيا (100%) و ژبهرێكچوونا بارێ ئاراميێ و زۆربوونا ململانهيێن سياسي بۆ بهرژهوهنديێن كهسوكي و حزبي كو دژي بهرژهوهنديێن وهلاتييانه، ئهو وهلاتيێن چو ڕێ نهيي.
ئهڤرۆ دهمێ ئهم دبێژين حوكمهتا ههڤپشك، رامان وێ ئهوه كو ئهم ههموو پشكهكين ژ وێ حوكمهتێ، پاشي پشكهكين ژ پرۆسێسا ئاڤاكرنا ئيراقا پێكهاتي، بهلێ ئهڤ حوكمهته ب تنێ ناڤه، نهكو ههڤپشكي، چنكو بيروبۆچوونێن كهسێ لدۆر چاوانييا ئاڤاكرنا ئيراقێ ناهێنه وهرگرتن بۆ گههشتنا ديمۆكراسييا دروست، ژبهر ڤێ چهندێ ئهوا كو ب گشتي مللهتێ ئيراقێ و ههرێما كوردستانێ دبينيت مالكي و حوكمهتا وي كار ب رهتكرن و تاكڕهويێ دكهن بۆ هندێ كو ههموو دهستههلاتان بكهنه د دهستێن كهسهكيدا! ئهوژي سهرۆك وهزير نوري مالكييه، ئهوێ كو وهسا دبينيت ئهو دێ ب تنێ شێت فهرماندهييا ئيراقێ كهت ل وي دهمي كهسێ دي نابينت جهێ وي بگريت، ئهها ئهڤه كێشه و كارهستاتا دروستييه بۆ گشت مللهتێ ئيراقێ.
ل دووماهيێ دێ بێژم، مانا حوكمهتا نهۆ، ههر ژ دامهزراندنا وێ رێڕهوا وێ يا تژي ئاستهنگ و پێلێن گهندهليێ و بێي راگههاندنا پرۆكرامهكێ سياسيێ رۆهن بوويه، يان بنۆكهيێ سياسهتهكا ب ديدهكا ستراتيژي بۆ ههموو ديمهنێن پرۆسێسا سياسي كو دووربيت ژ مهرهمێن حزبي و كهسوكيكرنا ديدوبۆچوونان، وهكو بكارئيانانا دهستووري و قانوونان وهكو ئاميرهيهك بۆ دهربازكرنا بۆچوونێن مالكي كو ئهو زۆر د دوورن ژ پرۆسێسا ديمۆكراسي، ئهوا دهستووري وهسا ب خوهڤه گرتي كو دڤێت كاروبار د بهرژهوهندييا گشت مللهتيدا بن، نهكو د بهرژهوهندييا كهسهكێ ب تنێ يێ ستهمكار لسهر ئيراقا نوو و ديمۆكراسي.
|
|
|
|
|
|
|
