| |
|
|
| 2012-07-01
|
|
ئهردۆگان نه زهلامێ چارهكرنا پرسگرێكا كورديه |
 مهسعود چهلكي
دهمهكێ درێژه پارتا داد و گهشهپێدان (AKP) ب سهرۆكاتييا سهرۆك وهزير ئهردۆگان ل تركيێ مژوولي چارهكرنا پرسگرێكا كورده، بێي كو لايهنێ دى يێ ههڤپهيڤينێ بۆ چارهكرنا پرسگرێكێ دهستنيشان بكهت!، ههولێن بێ بنهما ب مهبهستێن بهروڤاژي چارهكرنێ پێنگاڤان د هاڤێژه، ههرچهنده ههولێن پارتا داد و گهشهپێدان ل قادا ناڤنهتهوهيي و ژ لايێ گهلهك لايهنانڤه ب باشي هاتبنه ههلسهنگاندن، لێ ههر ناهێته وێ واتايێ كو كورد ڤي كهسي ب كهسهكێ سهرهكي بۆ چارهكرنا پرسا كورد ل تركيێ بدهنه زانين، ژبهر كو گوهۆڕين و پێشهاتهيێن نوو دهێنه مهيدانێ ژ ئهنجامێن كهدا ملێن سياسهتمهدار و پارت و لايهنێن كوردينه، نهكو يێن ئهردۆگانێ سهرۆك وهزيره.
ههلبهت ل كوردستانا باكۆر، د ڤان سالێن بۆريدا، نهخاسمه پشتي سالێن حهفتێيان و ژ ڤڕدا، گهلهك گوهۆرين ب خوه ڤه ديتنه، ئهگهر چهند ئهڤ گوهۆرينه لپێشچاڤ نههێنه ديتن، لێ ژ لايێ گهلێ كورد ب گرنكى دهێته حهسباندن، ژبهر كو سالێن بهري هنگێ ل كوردستانێ بێدهنگييهكا مهزن ژ لايێ كوردانڤه دهاته ديتن، ههيا گههشتبوو وێ چهندێ ل تركيێ د شيانێن كهسهكيدا نهبوو ب دروستي بێژيت ئهز كوردم، بهلكو ههموو بها و ژێهاتي بۆ تاكێ ترك بهرپا كربوون و كوردان ژي ل همبهرى ڤێ يهكێ ب تنێ بێدهنگي ههلبژارت بوو.
سيستهمێن رێڤهبرنا دهولهتا تركيێ ههر ژ دهسپێكا كۆمارێ و ههيا نها ژ بۆ چارهكرنا پرسا كوردى، مرۆڤ دكاريت بێژيت ههمان سيستهمن و هيچ گوهۆڕينهك بسهردا نههاتييه، ههموو ژي لسهر مژارا چارهكرنا پرسا كورد وهكههڤ دهێنه ديتن، لێ ژ وێ ستهم و زولما ل گهلێ مه دهاتهكرن بۆ سهدهمهك سهرهكي كو رێكخستن و گرۆپ و پارتێن سياسيێن كوردي دهربكهڤن و لهمبهرى پێشيگرتنێ ژ ڤێ ستهمى بكهڤنه د وارێ خهباتێدا، دهما ئهڤ يهكه ژي بوويه ژيوار هێزا كوردان لبن زولما دهستههلاتا تركيێ سهلماند كو ئێدي نكارن بێدهنگيێ لبن ڤان سيستهمێن فاشيزمانه ژيانێ ب دۆمينن، سهرهرايي توندرهوي و ههولێن دهسههلاتێ داكو پێشيێ ل ڤان پارت و بزاڤان بگرن يێن كو داخوازا مافێن گهلێ كورد دكهن، لێ ئهنجامێن نهسهركهفتنا وان د پێشيگرتنا ڤان ههولاندا، رێكخستن و هۆشيارييا تاكێ كورده، ئهڤ يهكه ژي بۆ سهدهمهكێ سهرهكێ كو گوهۆرين پهيداببن، و رۆژ بۆ رۆژێ بگهڤنه د گهشهكرنێدا ههيا گههشتينه وي راددهيي كو ئهڤرۆ جيهان ههمي ئاگهداري ڤێ راستيێ ببيت، كێشه د وي چوارچووڤهييدا دهركهڤت يێ تركيێ بۆ دانايي، ئهڤ پرسا هنده سالا مايه بێ چارهسهري بۆ مژارا وهلاتێن جيهانێ ههموويێ، چاوان ئهڤرۆ بوويه خالهكا سهرهكي داكو تركيێ بكهڤيته د ئێكهتييا ئهورۆپايێدا، نها ژي نهچارهكرنا پرسا كوردى كاريگهرترين رێگره د رێيا چوونا تركيێدا بۆ ناڤا ڤێ ئێكهتيێ، ههيا ئهڤ پرسه نههێته چارهكرن ب زهحمهته تركيێ بكاريت ببيته ئهندام د ئێكهتييا ناڤبريدا.
ب درێژييا مێژوويێ كوردان قادا شۆڕشێ ڤالانهكرييه و ب رێيا خهباتا چهگداري روبهروويى دهستههلاتێن تركيێ د بوون، لێ دهستههلاتێ نه تهنێ د ئالييهكێدا ههولێن تونهكرنێ دانه مهشاندن، بهلكو زۆر ئالييانڤه ههول دهاتنهدان و د بوونه سهدهم كو بێ ئومێدييهك لجهم تاكێ كورد پهيداببيت، ژ وان ههولان؛
- نههێلانا دهليڤهيا كاري ل دهڤهرێن كوردنشين، سهدهمهكێ سهرهكيێ كۆچكرنێ بوويه ژ گوند و دهڤهرێن كوردنشين بۆ باژێرێن دن يێن تركيێ.
- بكارئانينا سيستهمێ قورجاتيێ (جهحش) ببوو سهدهمهك ب دههان هزار كهسێن كورد د ناڤا ڤي سيستهميدا جهبگرن، ببنه زهلامێن حوكمهتێ بهرامبهر مۆچهكى.
- بنپێكرنا چاندا كوردي ب رێيا ئينانا چاندێن بياني.
- قهدهغهكرنا زمانێ كوردي وهكه زمانێ پهروهردهيێ.
- بكارئانينا هێزێن تايبهت بۆ تيرۆركرنا وان كهسان يێن بهرهڤ رهوشهنبيريێ دچن.
ئهڤه ههموو ببوونه رێگر د رێيا تاكێ كورددا بۆ وێ چهندێ نهكاريت لڤينان د هزرا خوهدا بكهت، ژبهر وێ چهندێ ژي مرۆڤ دكاريت ڤان كاران د چوارچووڤهيێ تونهكرنێ بدهته نيشاندان، دهستههلاتێن ئێك لدووڤ ئێكێن تركيێ شيان كوردان بهربهلاڤ بكهن لسهر باژێڕێن تركان، كهسێن ماينه لسهر جهێن خوه ژي بهلكو جهێ ژيارێ لێنهبوو و گهلهك نهچارمان وهكه زهلامێن دهولهتێ جهێن خوه د ناڤا سيستهمێ قورجاتيێ بكهن، ب ڤي ئاوايي دهستههلات شيا كارتێكرنێ ژ هزرێن تاكێ كورد بكهت و وهنهكهت هزرا وي لڤين بكهڤيتێ.
ئهڤرۆ مژارا چارهكرنا پرسا كوردى گههشتييه وي رادهيي پترييا وهلاتێن جيهانێ ئاگهدارن، مللهتهكێ زێدهتر ژ بيست مليۆن يێ بێى ناسنامه و زمان ئهڤرۆ جهێ حێبهتييا ههموو جيهانێيه، كهس ئێدي نكاريت ئينكارێ ژ ههبوونا ڤي گهلي بكهت، سياسهتا پارتا داد و گهشهپێدان لهمبهرى چارهكرنا پرسا كورد ژ خاپاندنێ پێڤهتر تو تشتهكێ دى نينه و پرۆژهيێ ڤهكرنا تركيێ بهر ب ديمۆكراتيێ د چوارچووڤهيێ وێ پرۆسێسێدا بوو يێ بهري وهختى تونهكرنا گهلێ كورد كرييه ئارمانجا خوه يا سهرهكي و هيچ هيڤيخوازييهكا گهلێ كورد تێدا نهبوويه، بخوه مژارهكا ڤهشارتييه و بێى بنهما بوويه، كهسێن سهركێشييا وێ ژي دكر كهسانێن كومپلۆكهر بوون، نه جهێ باوهريێنه، ئهڤجا لبن ههر ناڤهك و درووشمهكێ بيت، وهسا ب ئاساني نابيته جهێ باوهرييا گهل، ئێدي پرس گههشتييه وێ يهكێ كو پێدڤي ناكهت كهسهكێ وهكي ئهردۆگان بكهينه جهێ باوهرييا خوه بۆ چارهكرنا پرسا كوردى.
|
|
|
|
|
|
|
