| |
|
|
| 2012-06-04
|
|
رۆلێ بهردانێ د گهشهپێدانا دياردهيا تاوانكاريێ دا |
 پارێزهر: ئهحمهد عارف ئامێدي
وهرگێران: رێبهر سپينداري
ههڤژيناتي دهستپێكا پێكئينانا خێزانێيه و پێك دهێت ژ گههشتنا دوو دهربرينان دهربرينا كوري و دهربرينا كچێ، ئهڤجا دهمێ ئهڤ ههردوو دهربرينه دگههنه ئێك ههڤژيناتي پهيدادبيت و پاشان خێزان دهێته پێك ئينان ب رێكا گرێبهستا ههڤژينيێ.
و پشتي پێكئينانا ههڤژيناتيێ و خێزانێ دێ رهفتارێن ههردوو ههڤژينان ئاشكرابن و دێ سهركهفتن و نهسهركهفتنا ڤێ ههڤژيناتيێ دياربيت، يان دێ ههڤژينيهكا سهركهفتي بيت و دێ خێزانهكا سهركهفتي و بهختهوهر ژێ پهيدابيت سهرهراي ههر بارودوخهكي يان دێ ههڤژيناتيهكا نهسهركهفتي بيت و دێ بيته ئهگهرێ ژناڤچوونا خێزانێ و بهردانێ ژبهر هندهك ئاريشهيان دناڤبهرا ههردوو ههڤژينان دا.
و گهلهك بيروبوچون و شلوڤهكرن بۆ وان ئاريشهيێن دبنه ئهگهرێ بهردانێ دناڤبهرا ههڤژينان دا ههنه، لێ سهرهراي ههر شلوڤهكرنهكێ و ههر ئهگهرهكێ دبيته ئهگهرێ بهردانێ و ژناڤچوونا خێزانێ دێ بێژين كو تانوكه رهفتاركرن دگهل ئافرهتێ نهگههشتييه ئاستێ وێ پێشكهفتنا كومهڵايهتي و رهوشهنبيري و سياسي و ئابووري ئهوا د جڤاكێ مهدا بهرپابووي.
و ههر چهنده ل دووڤ ئاينێ ئيسلامێ كريارا بهردانێ ل دووڤ هندهك مهرجێن قورس دروسته لێ دئايينێ ئيسلامێ كرێتترين تشتێ حهلال بهردانه و ئهڤهژي وێ چهندێ دگههينيت كو ئاينێ ئيسلامێ ب ههمي شێوهيان دگهل گرتنا دهرگههێ بهردانێيه و پشتهڤانيێ لێ ناكهت، چونكي گهلهك شينوارێن نهباش ژڤێ چهندێ پهيدادبن.
و چ پێنهڤێت كهسێ ژههميان پتر زيان ڤێ دكهڤيت ژبهردانێ زاروكن، بتايبهت ئهو زاروكێن مهزن دبن دناڤ خێزانێن پري شهرو پێكدادان و نهرێككهفتن و نهتێگههشتي دا و ئهڤ زاروكێن ههنێ بتايبهت پشتي بهردانێ چ جهان ژ جاددهي باشتر نابينن كو قهست بكهنێ ژبو ديركهفتنێ و رهڤينێ ژڤي باردودوخێ نهخوش و پري شهر و ناكوكي يان دبيت ئهو زاروك دگهل دهيكێ يان بابێ بژيت و بێي ئهو باب يان دهيك گرنگيهكێ پێبدهت بهلكو پێچهوانهي ڤێ چهندێ دبيت لايهنهك (چ دهيك يان باب) گهلهك ئهو زاروك بهێته ئێشان و پشگوهئێخستن ژكهرب و كينێن لايهنێ ديتر دا.
وچونكي تاوان ئێكه ژ دياردێن جڤاكي وهك ههر دياردهيهكا ديتر يا جڤاكي و دهێته روودان ههردهما ئهگهرێن وێ پهيدابوون، ئهڤجا دياردا بهردانێ دناڤبهرا ههڤژينان دا ئێكه ژ ئهگهرێن سهرهكي يێن گهشهبوونا هزرا تاوانكاريێ لدهڤ كهسي بتايبهت توێژا سنێله و گهنجان، چونكي گهلهك ژ ڤان سنێه و گهنجان ئهوێن ژئهگهرێ بهردانا دهيك و بابێن وان ماينه بێ سهرپهشت و بێ پهروهردهكرن بهرهڤ كارێن تاواني يێن بچووك چووينه وپاشي هێدي هێدي هزرا وان يا تاوانكاري گهشهسهندييه و بهرهڤ ئهنجامدانا كارێن تاواني يێن مهزن و ترسناك چووينه وبووينه تاوانكار و بسزايێن توند هاتينه سزادان.
ئهڤجا ئهس پێشنياز دكهم كو ماموستايێن مه يێن زانا دبوارێ زانستێ جڤاكي دا رابن ب ڤهكولين و ديڤچوونا فايلێن دادگههێ سهبارهت بهردانێ و ئهگهر و چارهسهريێن وێ بزانن بشێوهيهكي كو بشێن دياردا بهردانێ كێم بكهن. ههروهسا دگهل دانانا هندهك رێك و چارهسهريێن باش بۆ خودانكرن و پهروهردهكرنا وان زاروكێن دبنه قوربانێ بهردانێ ژبهري بهرهڤ تاوانكاريێ ڤه بچن.
ههروهسا پارێزهران ژي رولهكێ مهزن و ئهكتيڤ ههيه د كێمكرنا رێژا بهردانێ دا و د چارهسهركرنا كێشه و ئاريشهيێن ههڤژينان دا چونكي ههڤژين دگهل پارێزهرێ خو ههمي نهێنيان ئاشكرادكهت و ئهڤهژي دبيته فاكتهرهكێ باش بۆ پارێزهري كو بشێت ڤێ ئاريشێ چارهسهربكهت بهري ب گههيته راددێ بهردانێ.
|
|
|
|
|
|
|
