| |
|
|
| 2012-04-15
|
|
ژ ئيرادهيا گهلي بۆ ئارمانجێن نهتهوهيي |
 ئيحسان ئامێدي
پرانييا رێكخستنێن سياسي وهسا خوه نيشانددهن كو دامهزراندنا وان دهربڕينه ژ ئيرادهيا پترييا خهلكي و خهباتێ دكهن ل پێناڤي بجهئينانا ئارمانجێن خهلكي و ههميشه ملكهچن بۆ ئيرادهيا گهلي و خوه ب حهژێكهر و بهڕهڤانيكهرێن ديمۆكراتيێ دياردكهن و وهكو پرانسيپهكێ سهرهكي د پرۆگرامێن خوهدا دادنن، ئهڤه دهربڕينهكا تيورييا سيستهمێ ديمۆكراتييه و لێ دهێته چاڤهڕێكرن بكهڤيته د وارێ كريارێ و بجهئينانێدا.
ل ههرێما كوردستانێ ههمي رێكخستنێن سياسي هوسا خوه نيشانددهن ژبهر هندێ ژي تاكو راددهيهكي ژيوارێ ههمهجورييا سياسي و جڤاكي و پێكڤهژيانا ب ئاشتيانه جێگيربوويه و ههڤڕكييا سياسي سروشتێ خوه وهرگرتييه و هندهك جاران ژي ههڤڕكيێ سروشتهكێ ململانهيا سياسي ژێ كهڤتييه!. پشتي خهباتهكا دوور و درێژ و قوربانييهكا زۆرا خهلكێ ههرێما كوردستانێ ب رێكخستنێن وێ يێن سياسيڤه، گهلێ ههرێمێ ب قهوارهكێ سياسيێ ئازاد شادبوو و دامهزراوێن خوه يێن دهستههلاتداريێ لدووڤ سيستهمهكێ ديمۆكراتي دهربڕ ژ ئيرادهيا گهلي د چوارچووڤهيێ ئيراقا ديمۆكراتييا فيدراليدا پێكئينان و كۆمهكا مافێن خوه يێن نهتهوهيي بدهستڤهئينان و چاڤهرێنه ئهوێن مايي ژي بهێنه بدهستڤهئينان، د ههمان دهمدا، ههرێما كوردستانێ خهمههلگرا دهرد و ژانێن دهڤهرێن ڤهقهتيايي و پارچهيێن ديترێن كوردستانێيه و ههول و بزاڤان دكهت بۆ ڤهگهراندنا وان دهڤهران و بۆ چارهكرنا دۆزا كوردي ل وان وهلاتێن پارچهيێن ديترێن كوردستان داگيڕكرين ب رێكێن ئاشتيانه، بۆ ڤێ مهبهستێ برياره د ماوهيێ بهێتدا كونفرانسهكێ نهتهوهيى ل كوردستانێ ل ههولێرا پايتهختا ههرێما كوردستانێ بهێته بهستن بۆ راگههاندنا پهياما ئاشتيێ سهخمهراتي چارهسهرييا ئاشتيانه بۆ كێشهيا كوردستانێ ل ههموو پارچهيان، ئهڤه ئهركهكێ نهتهوهيێ پيرۆزه و ههڤدهمه دگهل هيڤي و پێشبينێن خهلكێ ههرێما كوردستانێ، كو پێنگاڤهكا ديتر بهرهڤ گوپيتكا ئامانجا نهتهوهيي بهێته هاڤێتن و دهولهتا ههرێما كوردستانێ بهێته دامهزراندن.
لێ وهكو ديار، ههرێما كوردستانێ ئهو بهرههڤييا ناڤخوهيي نهكرييه و هێشتا نهشيايه باوهرنامهكا نهتهوهيي يان دهستوورهكێ كوردستاني بۆ خوه دانيت و خوه بۆ ملكهچكهت، ههروهكو حهتا نها ژي سهرهرايى رهواتييا دامهزراوێن دهستههلاتداريێ ل ههرێمێ، لێ ئهو ملكهچبوون و گوهداري بۆ وان مهرجهعێن ههلبژارتيێن رهوا ژ ههموو لايهكيڤه نينه! بهلكي نها پتر ژ ههروهختهكي جوداهييا بۆچوونان و نهئێكههلويستييا دناڤبهرا هێزێن سياسيدا خوه دياردكهت و ههر لايهكێ دههۆلێ لدووڤ بيركرنێن خوه لێددهت و ناڤهگهڕن بۆ ئيرادهيا مللهتي، كا چ ژێ دڤێت؟ ئهڤهژي زهنگهكا مهترسيداره!، نهمازه دهمێ لايهنێن سياسي ههلسوكهوتێ پشتقڕاندنێ و شكاندنا پيرۆزييا دژي ههڤدوو بكاردئينيت! مللهتێن جيهانێ ههمي خوه كۆمڤهدكهن لژێر درووشم و هێما و پيرۆزييا بهرهڤ ئامانجێن نهتهوهيي و نيشتيماني، ب تايبهتي دهمێ پيرۆزييهكێ بهردهوامي ههبيت بۆ رهوشهكێ بهرهڤ بدهستڤهئينانا ئامانجا نهتهوهيي، لێ مخابن ل ههرێمێ ههر ب ئهقلييهت و سياسهتا شكاندن و رهتكرنا يێ ديتر رهفتار دهێتهكرن، ههروهكو ڤاژيكرنا سياسهتا دهولهتێن ههرێميێن داگيركهر!. من پێ سهيره دهمێ سهرانێن كوردان بهرههڤبن كو پێكڤه بۆ زينديكرنا بيرهوهرييا ناڤدارهكێ نهمر، يان بۆ ئاههنگهكا هونهري، بهلێ د دلێ وانڕا نهچيت سلاڤهكێ ل بيرهوهرييا سهركردهكێ نهتهوهيى و نهمر و خودان رێبازهكا زيندي بكهن و بكهنه پشكهك ژ سهرفرازيێن شانازي پێ دهێتهكرن ل وهلاتي و ههردهم لبيربينن بمهبهستا پێكڤهگرێدانا نهتهوهيي و زينديكرنا سهرفرازيێن نهتهوهيي و هۆشياركرنا تهڤايي ب مافێن وانێن رهوا، ئهڤ ههلسوكهوته هيڤييان بۆ ههڤگرتن و پێدڤييان لاوازدكهت!. رێكخستنا ناڤمالييا ههرێما كوردستانێ ئێك ژ پێدڤيێن سهرهكيێن سهركهفتنا نهتهوهييه و نوكه پتر ژ ههروهختهكي ههرێمێ پێدڤي پێ ههيه، داكو بشێت بهراهيێ ل ئاستێ ههرێمێ ئامانجێن خوه بجهبينيت و پاشي ل ئاستێ نهتهوهيي ژي پێنگاڤێن كرياري بۆ پاڤێژيت.
ل ئاستێ ههرێما كوردستانێ ياسايێن دامهزراوێن دهستههلاتداريێ چارهسهرييا ڤان پرسگرێكان كرييه، لێ پێگيري و گوهدارييا پێدڤي بۆ نينه! ئهڤهژي خوه د گوتارێن لايهنێن سياسيدا لسهر پرسێن چارهنووسي نيشانددهت كو ژێكجودابوون ههيه، هندهك جاران خوه دناڤا ئێك هێز ژيدا پتر ژ بۆچوونهكێ خوه نيشانددهت!.
ب ديتنا من ئهڤرۆ ئهم لسهر ئاستێ ههرێمێ بهري لسهر ئاستێ نهتهوهيي پتر پێدڤي ب كونگرهيهكێ ناڤخوهيى يێ ههرێمێ ينه بۆ رێكخستنا ناڤمالييا ههرێما كوردستانێ، ب مهبهستا دانانا باوهرنامهكا نهتهوهييا ههڤگرتييا پێگير، نهمازه ههرێم يا دقۆناغهكا نازكدا و دهرفهتێن زێڕين لبهرامبهرى وێنه و دهێته خاستن ب زووترين دهم سهرانێن سياسي لژێر دهستههلاتدارييا دهربڕ ژ ئيرادهيا مللهتي كۆمببن و بڕيارا خوه يا چارهنووسي بدهن، خوهشبهختانه ژي ئهڤرۆ ئامانج يا زهلالتر لێدهێت و بهرنامێ چاكسازيێ و هێلێن گشتيێن ستراتيژييهتا چاكسازيێ يێن سهرۆكێ ههرێما كوردستانێ هاتنه راگههاندن و كابينهيا حهفتێ يا حوكمهتا ههرێما كوردستانێ هاته پێكئينان و بهرنامهكێ بهرفرههـ و ريكوپێك و ههمي لايێن ڤهكر هاته دانان و كارێ پێ دهێتهكرن، و دهێته خاستن تهڤايا خهلكێ كوردستانێ ب دامهزراوێن خوه يێن سياسي و كارگيري و مهدهنيڤه خوه لێ بكهنه خودان و بههڤڕا كاربكهن بۆ سهرێخستنا وێ ستراتيژييهتێ و وي بهرنامهيێ دهربڕ ژ ئيرادهيا گهلي كو لدووڤدا ههرێمێ بهرهڤ دهستكهڤتيێن نهتهوهيى يێن ديتر ببهت.
ئهگهر ههڤگرتنا ناڤخوهييا ههرێمێ نهبيت بۆ سهرئێخستنا ياسايێن ههرێمێ و پرۆژه و ستراتيژييهتا چاكسازيێ و بهرنامهيێ حوكمهتێ، ئهڤه وهسا خوه نيشابدهت كو هێشتا ل ئاستێ ههرێمێ ئهم نهشێين وێ ههڤگرتنێ چێكهين بۆ سهرێخستنا پرسێن چارهنووسي، پا دێ چاوا شێين ل ئاستێ نهتهوهيي وێ پهياما ههڤگرتي پێكئينين؟! لێ ل ههمي رهوش و بارودۆخاندا ب هيڤيبوون و كار بۆ كرن و رژدي لسهر كرن پێدڤييه.
بهري ماوهيهكي كۆنكرهيێ نهتهوهيى لاوان ل ههرێمێ هاته بهستن و هاته زانين كو چهندين لايهنێن نهتهوهيي خوه ژێ ڤهكێشا، وهكو مرۆڤ سياسهت و بزاڤێن هندهك هێزێن سياسي ل ئاستێ ههرێمێ و ل ئاستێ نهتهوهيي دزانيت، ئهو ئامادهنينن كوهدارييا چو دهستپێشخهريێن دامهزراوێن رهوايێن ههرێمێ بكهن، ژبهر هندي بۆ پرسێن چارهنووسساز و كۆنفرانسێ نهتهوهيي ژي گومانهك ههيه كو بگههنه ئهنجامهكێ جێگير! و نابيت ئهڤه وهسان خوه نيشابدهت كو ئهڤه قهدهرا كوردانه كوههڤنهگرن و كوهداري ههڤنهبن و كوردستان ژي ههرا بندهست و پارچهكري بيت! نهمازه كو چاره ههيه، ئهوژي ڤهگهريانه بۆ ئيرادهيا گهلي داكو بگههينه ئامانجان.
هندهك پرس ههنه ئهركێن نهتهوهيينه، چ قۆناغ و چ كاودان بۆ ههبن دڤێت پێگيري بۆ ههبيت و كار بۆ بهێتهكرن و دهربرين ژێ بهێتهكرن، تاكو ب ئهنجام بگههيت، دڤێت ژێياتييا مه يا نهتهوهيي خورتبيت و بهرژهوهندا نهتهوهيي لسهر ههر بهرژهوهندهكا بهرتهنگا كهساتي و سياسي بكهڤيت، دڤێت ههلسوكهوت و بيرهوهريێن خوه پتر سيمايهكێ نهتهوهيي بدهيني و ههڤگرتنا نهتهوهيي لسهر ههر بهرژهوهندهكا ديتر بيت، چونكي ئهڤهيه ئيرادهيا گهلي و پرسهكا تهڤايه و ههمي پێكڤهژێ بهرپسيارن.
ل ههرێما كوردستانێ دامهزراوێن دهستههلاتێ ب رێكا ههلبژارتنێن گشتي هاتينه دامهزراندن كو دهربڕينێ ژ ئيرادهيا گهلي دكهن و لسهر ئاستێ كوردستانێ ژي تنێ دامهزراوێن دهستههلاتداريێ ل ههرێمێ شرعي و ياسايينه و دهربڕينێ ژ ئيرادهيا گهلي دكهن، لهوا ژ ههمي ئالييان دهێته خواستن ل ههمي دهم و ل ههمي جهان ههروهسا ل ههمي ئاست و ل ههمي بياڤان رێزێ ل وێ ئيرادهيێ بگرن و گوهدارييا وێ بكهن و خوه ملكهچكهن بۆ بجهئينانا وان فهرمان و بڕياران، ب تايبهتي يێن سيمايهكێ نهتهوهيي ههبيت، داكو ئيرادهيا مللهتي ههرا سهركهڤتي بيت و ئامانجا نهتهوهيي بجهـ بهێت.
|
|
|
|
|
|
|
