| |
|
|
| 2012-04-11
|
|
شانۆگهريێن ئهلماني د ههمبێزا خهلكێ دهۆكێ دا.. پشتى سێ رۆژان بهردهوامى |
 ريپۆرتاژ: تاهر رێكانى
پشتى سێ رۆژان بهردهوامى ب شانۆگهرييێن ئهلهمانى ل باژێڕێ دهۆكێ هاتيه دان، سێ شانۆگهرى هاتنه نمايشكرن، بۆچوونێن جودا ژ لايێ تهماشهڤان و كهسانێن تايبهتمهندڤه هاتنه وهرگرتن، ههر لايهنهكى وهكى خوه ئهڤ شانۆگهرييه شرۆڤهكرن، لهوا مه ڤيا ڤان بۆچوونان بهرچاڤ وهرگرين و د ئهنجامدا ئهڤ ريپۆرتاژه هاته بهرههڤكرن:
ل دهستپێكێ شانۆكار ئهحمهد مشهختى بڤى رهنگى بۆچوونا خوه دهربرى و گۆت: ئهگهر ئهم بهرێ خوه بدهينه گرۆپێ ئهلهمانى كو ئهڤرۆ هاتينه باژێڕێ دهۆكێ، ئهز وهك شانۆكارهك ب دهستكهفت دزانم، ژبهركو مهرهما سهرهكى يا ههر شانۆگهرييهكێ پهيامهكا مرۆڤايهتييه، ئهو پهيام ل ئهلهمانييا بيت يان كوردستانێ يان ههر جههكێ دى، پاياما وان دێ بۆ مرۆڤان بيت، لهوا ئهڤه دهمێ سێ رۆژانه رهوشهك و ههستهكا خوهش دايه باژێڕێ دهۆكێ، مێڤاندارييا ڤان جۆره شانۆگهرييان ب گرنگى دهێته زانين خاسمه ئهم مفاى وهردگرين وهك پێزانين كانێ شانۆيا جيهانى ب گشتى ئيرۆ د چ ئاستدايه. ديسان مشهختى گۆت: بڤێ شانۆيێ مه زانى دێ چهوا شانۆيا جيهانى ناسكهين و ههر وهسان دێ ههلسهنگاندنا خوه دگهل كهين، داكو بزانين ئهم د چ ئاستداينه و ل سهر مه پێدڤيه ئهم چ بكهين بۆ پێشڤهبرنا هونهرى بگشتى و شانۆيێ ب تايبهت، ديسان ناڤبرى دياركر كو ئهڤى گرۆپى تشتهك بۆ مه دياركر كو پتر د وارێ ئهدهبياتاندا كار دكر يان د وارێ دهرونى دا كار دكر، من ب خوه مفا ژێ ديت و بۆ من بوو هاندهرهك د ئايندهيدا پتر خوه ماندوو بكهم و پێشكهفتنێ دكارێ خوهدا بكهم، ب ديتنا من مهرهما وان ئهوه پتر ههڤناسين و پهيوهنديێن خۆرتتر دگهل شانۆيا جيهانێ پهيدا بكهن، لهوا پێشوهخت ئهمژى وهك شانۆكار هاتبووينه مێڤانكرن ل وهلاتێ ئهلهمانييا بۆ نيشادانا شانۆيێن كوردى، ل دووماهيێ مشهختى دياركر كو شانۆ زمانهكێ جيهانييه چ ئاستهنگ نهبوون كو ببنه گرێك بۆ تێنهگههشتنا تهماشهڤانان.
بهرۆڤاژى بوچوونێن بهرى نها هاتينه گۆتن تهماشهڤانهك ب ناڤێ رێبهر كوردۆ د بۆچوونێن خوهدا نهرازيبوونا خوه دياركر و گۆت: ب هزرا من پێدڤينهدكر ئهڤ شانۆيه كو ئهڤه سێ رۆژه ههر ئێك ب چيرۆكهكێ دهێته نمايشكرن، هاتباكرن، ل شوونا وان هندهك شانۆيێن كوردى ژ لايێ شانۆكارێن مه يێن خودان شيان هاتبانهكرن، دا پتر دهربڕينێ ژ ژيوار و كولتۆرێ كوردى كهن، لهوا ئهڤ ههر سێ شانۆيێن هاتينه نمايشكرن، من ديت يا ب زهحمهت بوو تهماشهڤان تێبگههيت، تنێ يا رۆژا دوێ نهبيت ئهوا بناڤێ ( تهڤلههڤ) كو ل سهر خالهكێ راوهستيا بوو، كو ههموو جڤاكێن دونيايێ د ههڤپشكن ب وێ خالێ، ئهوژى ل سهر هندێ بوو كو مرۆڤ د كهسايهتييا خوه دا چوار پێنج كهسێن دينه، لهوا شانۆگهرييا تهڤلههڤ ل سهر وێ يهكێ راوهستيا كو فهلسهفهكا جوان تێدا ههبوو، ئهم وهك كورد ژى دڤێ پهنجهرێ را تشتان پێ دبينين، ژ لايهكێ دووڤه ناڤبرى گۆت: تشتێ مرۆڤ پێ دهێته ئێشاندن كو مه پێشبينى نهدكر خهلكهكێ زێده دێ بهرههڤى ڤێ شانۆگهريێ بيت، بهلێ وهسا دياره ئهم مللهتهكين مێشكێ مه يێ د چاڤێن مهدا ، ههموو تشتهكى ئهم ب سيما و سهروبهرى دههلسهنگينين، بێى وێ چهندێ ئهم ئاورييهكێ د ناڤهرۆكا وێ بگههين، لهوا يا هاتييه گوهێن مه كو شانۆيهكا ئهلهمانى يه ئهم ههموو پێكڤه يێن هاتينه پێش، من باوهره پترييا وان تێنهگههشتينه و نهزانييه ناڤهرۆكا وێ چيه!! ههر چهنده پهيڤێن وان دهاتنه گوهۆرين بۆ زمانێ مه، بهلێ ما تهماشهڤان دێ تهماشهى شانۆيێ كهت يان نڤيسينێ؟! ژبهركو شانۆ ههموو لڤينێن لهشينه، لهوا ئهڤه دو رۆژ بوو ئهز يێ بهرههڤ، لێ باوهرناكهم من مفايهك ژێ ديتبيت، خوزى چهوا ئهم بهرههمێ بيانييان ب گرنگى دزانين وهسا مه يێن خۆمالى ژى گرنگى پێدابا، لێ ب مخابنيڤه ئهگهر شانۆگهرييهكا خۆمالى با من باوهره دو رێزێن بهراهييێ ژى تژى نهدبوون.
دهربارهى رۆلێ ژنێ دڤان شانۆياندا، وهكو ديار رۆلهكێ بهێزبوو داكو بزانين چ جياوازى دناڤبهرا شانۆكارێن دهۆكێ و ئهلهمانيادا ههيه، بۆ ڤێ پرسێ پهرى عهبدولا قوتابييا پشكا شانۆيێ ل زانكۆيا دهۆكێ دبێژيت: بديتنا من ئهز دبينم كو جوداهييهكا مهزن ههبوو ئهوژى ژ بهركو وێرهكى ل دهف ههبوو، ههست ب هندێ نهدكر كو كهسهكێ لبهرامبهر وێ راوهستييايه، ئهڤهژى وێ يهكێ دياردكهت كو ژيێ شانۆيا وان گهلهك يێ درێژه، ئهم نه ژ مێژهينه و كچێن مه وێرهكى نينه، ئهوژى ژ بهر گۆتنێن جڤاكينه و خهلك دگهل دهيك و بابان رێگرن، ژ بهركو ئهو كهس پيرۆزييا دهپێ شانۆيێ نزانن، بهلێ يا فهره ههر ئێك ژ مه ل جهێ خوه جڤاكى هشياربكهت، كو ب مێشكهكێ ڤهكرى بهرێ خوه بدهينه شانۆيێ، ههر وهسان بهردهوام بهێنه نيشادان داكو رێگر نهمينن، بهلێ بهرۆڤاژى ئهكتهرێن بيانى پيرۆزييا دهپێ شانۆيێ دزانن، كارێ مه ژ خوهڤهكرنه ، ههر چهنده سال بۆ سالێ ئهمژى يێ پێشكهفتنێ بخوهڤه دبينين، هيڤييا من ئهوه رۆژهكا نێزيك بهێت كو ئهمژى شانۆيا كوردى نيشا خهلكهكى بدهين.
ل دووماهيێ مهسعوود عارف رێڤهبهرێ رێڤهبهرييا شانۆيێ ل دۆر مهرهما ئينانا ڤى گرۆپێ شانۆيێ بۆ باژێڕێ دهۆكێ دبێژيت: مهرهم ب ئينانا ڤى گرۆپى ئهوه ئهزموونا خهلكهكى ببينين، ئهوێن خودان ئهزموونهكا باش د شانۆيێدا، رهنگه ژيێ شانۆيا ئهلمانى پترى سهد سالان بيت، ههر ديسان مفايێ دووێ ئهوه كو بينهرێ مه ژى ئاشنابوونهك پهيدابيتهڤه ل سهر شێوازێ شانۆيا ئهلمانى، كو گڕۆپێ تێياتهر ئهن دێر روور گڕۆپهكێ ناڤداره ل ئهورۆپا و ئهلهمانيا، ديسان سێ ئێڤارێن شانۆيێ بهێنه دانان ئهز ل وێ باوهرێ مه هونهر و شانۆ زمانێ مرۆڤايهتييێ يه، ئهز باوهردكهم چهوا مه تام و خوهشييهك باش ژێ ديتييه، وهسا تهماشهڤانان ژى ئهڤ تام و خوهشييه ديتييه، ژ لايهكێ دووڤه رێڤهبهرێ شانۆيێ گۆت: بهرى بيست سالان ژى مه نهشيايه ببينه خودان شانۆيهكا سهر ب خوه، كو ناڤێ شانۆيێ بيت، بهلێ هاتنا ڤى گڕۆپى وهلمه دكهت ئهم ههست ب وێ يهكێ بكهين كو ئهم وهكو كورد چهوا بشێين چيرۆك و بابهتێن خوه و روودانێن دناڤ ژيانامهدا دهێنه روودان، ههموويان ل سهر دهپێ شانۆيێ كۆم بكهين، بكهينه بابهتهكێ شانۆيێ، لهوا هيڤييا من ئهوه ئهڤ پره بهرفرههتر و بهردهوام بيت دناڤبهرا مه و واندا، ههر وهسان د ناڤبهرا مه و گهلهك گڕۆپێن شانۆيێدا ل سهرانسهرى جيهانێ.
|
|
|
|
|
|
|
