| |
|
|
| 2012-04-05
|
|
ئهرێ دهستبهردان ژ كورسيكێ شهرمزارييه يان سهركهفتنه؟! |
 د. شەعبان مزووري - دوبەى
پروسێسا گوهارتنێ ئەگەر نەهێتە وەرگرتن وەک بير و باوەري و هەموو ئاليێن جڤاکى ب خۆ ڤە نەگريت چ رامان ژ بۆ نينە. گوهارتن ديناميکا جڤاتا سەرکەفتييە، جڤاک ب هەموو پێکهاتهيێن خۆ د هەرموونيەکێ دا دژيت و د ڤێ هەرموونيێ دا هەموو لايەنێن جودا و د هندەک دەليڤهيان دا دژهەڤ هەڤدۆ تەمام دکەن. ب هيچ رەنگەکي نابيت کەسەک يان گرۆپەک بێژيت ئەز ل دەرڤەي ڤي ياساي مە، ئەڤە دبيتە ئەگەرێ تێکدانا بەلانسا سروشتييا جڤاکا ديموکراتى.
گەلو دەما ئەم باسي گوهارتنان دکەين ل باشۆرێ کوردستانێ مەبەستا مە تەنها هەر دو پارتێن دەستهەلاتدارن يان ژي مەبەستا مە گوهارتنا جڤاکييە کو ئەڤ پارتێن دەستهەلاتدار پارچەکن ژێ. گومان تێدا نينە کو گوهارتنا کەسان ل هەر دام و دەزگەهەکي مەرج نينە ژ بۆ هندێ رەوش باشتر لێبهێت، لێ مەرجێ هەرێ سەرەکي ژ بۆ دروستکرنا سيستەمەکێ ساخلەم پێدڤى ب ئامادەبوونا کەسايە کو بێ ئاستەنگ و ب دلەکێ شاد کارێ خۆ راسپاردەي کەسەکێ دي بکەن، دەما ئەڤ چەندە ژێ تێ خواستن. يەک ژ ئارمانجێن گوهارتنا کەسان ئەوە دەليڤە ڤەبيت ژ بۆ گەنجان ژ بۆ هندێ بکارن هزر و پێچێبوونێن خۆ بينتە بەرچاڤ، پێزانينێن خۆ بێخنە کار. خەلکێ مە دڤێت پێداچوونەکێ بکەت ل سەر ديتنا خۆ گوهارتنا کەسان. پرانيا جڤاکا مە گوهارتنا کەسەکي ل پوستەکي، يانژي سەرنەکەڤتنا کەسەکي ژ بۆ ب دەستئينانا پوستەکي وەک شکەستن، خرابي ب ناڤ دکەت، ئەڤە ژي ب خۆ دبيتە ئەگەرێ هندێ کو بەرپرسێن مە ناخوازن کورسيکێن خۆ ژ دەستبدەن، چونکي دەرخستنا خۆ ژ کارەکي ب شەرمزاري دزانن. گرنگ ئەم بزانين، ئەم د هەر کارەکي دا سەرکەفتي نابين، نەسەرکەفتنا کەسەکي د کارەکي دا نابيته رامانا هندێ کو ئەم د هەموو کارەکي دا سەرناکەڤين، دبيت مرۆڤ شڤانەک خراب بيت، لێ گاڤانەک باش بيت، هەر دو ژي کارن؟
ب سالانە بەشەکێ هەرێ زۆر ژ خەلکێ مە گازندا وي ئەوە کو هندەک کەس بووينە پەنجەشێر ل سەر دلێ وان، ب سالان هەوار دکەت لێ مخابن کەس د هەوارا وان ناهێت، د پرانيا جاران دا، ئەو گوهارتنێن هەيا ئەڤرۆ هاتينکرن پتر جوانکاري بوون ژ چارەسەريێ، چونکي ب ديتنا من هەيا ئەڤرۆ مخابن چ هێز ل باشۆرێ کوردستانێ دروست نەبووينە کو باوەريێ ب گوهارتنێ بينيت.
رەوايە بو هەر تاکەکەسي ئارمانجا وي يا درێژخايەن هەر پوستەکي ب دەست بينيت و بەرۆڤاژي ڤێ چەندێ کەسێن داخوازەک ب ڤي رەنگي نەبيت نەساخلەمن د مە ژيێ خۆ دا. زانايە بۆ مە هەموويا کو گەلەک پارتي، کۆمەلە، هێز، رێکخستن....هتد، ل ناڤ مە دا سەرهەلداينە د ڤان سالان دا، لێ پەنجەشێرێ رەهێن خۆ ل ناڤ خوينا مە هەموويان دا بەلاڤکرينە و ئێشا کەس ژ من باشتر نينە و ب نەمانا من قيامەت دێ رابيت ئەم هەموو يێن گرتين. گەلەک سەرۆک و بەرپرسێن ئەڤرۆ گازندە ژ سەرکردهيێن بەرێ دکرن و دگۆتن گەلو هەيا کەنگي دێ فلان کەس سەرۆک مينيت، لێ دەما ڤان کەسان هندەک گرۆپێن دي لبن ناڤێ دژدەرکەفتنێ بەرامبەر تەکرەويێ، جهێ داخێيە کمباختر لێهاتن. ديسان ئامادە نينين کورسيکا خۆ ژ بۆ کەسێ دن ژ دەستبەردەن و هەموو تشتەکي چاکێ هاتييهکرن ب ميراتێ خۆ ناسدکەن و هەموو چەوتەيا تێخن ستۆکێ بەڤلێن خۆ، چونکي نموونهيێن ژ دەرڤەي ڤێ چەندێ مە نينن، لەوما من چ نموونە ب ناڤ نەکرن.
مخابن دەما گوهارتن گەهشتي مەلايەکي ل مزگەفتێ ل باژێڕێ دهۆکێ مەلاي قيامەت راکر، مەلاي نەڤێت بهێت گوهارتن، خەلک ژبەر وي دچوو مزگەفتێ، تەنها ئەو دشێت رێکا خودێ نيشاني وێ گرۆپا خەلکي بدەت، تەنها ئەو راستبێژە، خەلکي ئەو بتنێ دڤێت، ل پشت وي نەبيت خەلک نڤێژێ ناکەت! کبارا وي نەبيت ئەو خەلک گوهداري کەسێ دي ناکەت، ئەزمانێ وي نەبيت چ ئەزمانێن دي تێناگەهن، لەوما گوهارتنا مەلاي نەمانا مزگەفتێ يە، چونکي هەر تشت ب خودانێ خۆ ئاڤايە، لەوما چەوا ئەڤرۆ وەلات شوونا ملکێ مللەتي بيت بويە ملکێ كهسان، وەسا مزگەفت ژي شوينا مالا خودێ بيت هندەک دخوازن بکەنە مالا خۆ و ل سەر ناڤێ خۆ تاپۆ بکەن هەر چەندە مالێ خودێ يە.
خەلکێ مە تا راددهيهكێ بێ ئومێدە ژ گوهارتنا ل سەر دەستێ ڤێ دەستهەلاتێ، بەرێ خۆ ددەن خودێ هەر کەس د رێيا خۆرا ژ مزگەفت و دێرێ هەيا لالەشێ، ژ خودێ دخواستن ئەگەر ئەڤ کەسە ب خۆشيا خۆ گوهارتنان نەکەن، خودێ ئيزراهيلي بۆ فرێکەت دا بهێن گوهارت.
ژ کەڤن دگۆتن ئەگەر مرۆڤ نەخۆش دکەفت دبڕنه دەف مەلا، قەشا، کوچەکا، لێ دەما ئەو نەخۆش بن دێ کيڤە چن. پرسا من پشتي مزگەفت بووينە ملکێ مەلا خەلکێ مە بەرێ خۆ کيڤە بدەت ژ بۆ هندێ خودێ ئيزراهيلي فرێکەت بۆ هندەک بەرپرس و مەلێن ئەڤرۆ؟!
|
|
|
|
|
|
|
